Posted by ផ្កាយNovels in ចំណេះដឹងទូទៅ, ពីនេះពីនោះ, វប្បធម៌ប្រពៃណី, អាហារខ្មែរ.
trackback
នំផ្លែអាយដែល ខ្ញុំ ធ្វើ ញ៉ាំនៅប្រទេសលាវ(ខ្វះវត្ថុធាតុដើម)
នៅស្រុកគេយូរ ពេលខ្លះមានអារម្មណ៍នឹកឃើញអ្វីៗជាច្រើនដែលមានលក្ខណៈខ្មែរៗ មិនថាជាសិល្បៈដូរតន្ត្រី ភាពយន្ត ឬបុណ្យប្រពៃណីជាតិនោះទេ ចំណីអាហារគឺជាចំណុចចាប់អារម្មណ៍សំខាន់មួយដែលម្នាក់ៗមិនអាចបំភ្លេចបាន ហើយតែងតែនឹកចង់ភ្លក្សរសជាតិនោះឡើងវិញ បើទោះជាគេទៅដល់គ្រហែងប្រទេសណាក៏ដោយ។
ដូចជារូបខ្ញុំអ៊ីចឹងដែរ នៅថ្ងៃមួយដោយអត់ទ្រាំនឹកឃ្លាននំផ្លែអាយខ្លាំងពេក ក៏ចាត់ចែងធ្វើដោយខ្លួនឯង។ ផ្លែអាយគឺជានំខ្មែរមួយប្រភេទដែលគេធ្វើពីម្ស៉ៅដំណើប និងមានស្ករត្នោតជាស្នូរកណ្តាល។ ប៉ុន្តែក៏មានបងប្អូនខ្មែរយើងខ្លះ នៅមិនស្គាល់ថានំផ្លែអាយនោះ មានរូបរាងយ៉ាងណាទេ។ នំនេះខ្ញុំក៏មិនឃើញមានប្រទេសណាគេមាននោះដែរ វាគឺជានំដែលមានលក្ខណៈខ្មែរពិតៗ ដូច្នេះនៅតាមហាងអាហារឬភោជនីយដ្ឋានតំបន់ទេសចរណ៍ខ្មែរណាមួយគួរតែមាននំនេះ ដោយច្នៃប្រឌិតយ៉ាងណាឲ្យមានលក្ខណៈទាក់ទាញខ្ពស់ ដើម្បីដាក់បម្រើជូនដល់ភ្ញៀវបរទេសនានានូវអ្វីដែលយើងមាន ហើយប្លែក ឆ្ញាញ់ និងប្រទេសដទៃទៀតគ្មាន… ជឿថាពិតជាបានកម្រៃកាក់កប និងការលើកទឹកចិត្តពីអតិថិជនទាំងជាតិនិងអន្តរជាតិមិនខាន។
នំ ផ្លែ អាយ ដែល កញ្ចប់ ខ្ទោង ត្រឹមត្រូវ
ខាងក្រោមនេះ គឺជាប្រវត្តិខ្លះៗដែលទាក់ទងទៅនឹងនំខ្មែរមួយប្រភេទនេះ៖
តាមវចនានុក្រមរបស់សម្តេចព្រះសង្ឃរាជជួនណាត បានឲ្យដឹងថានំផ្លែអាយមានឈ្មោះដើមថា«នំបំពួនស្ករ» ព្រោះជានំស្រស់មួយប្រភេទធ្វើដោយម្ស៉ៅដំណើប លញ់ស្រោបបំពួនដុំស្ករត្នោតបាត់បំបាំងមើលមិនឃើញ ហើយហេតុដែលនាំឲ្យមានឈ្មោះថា«នំផ្លែអាយ»ដែលរនោះ ដោយហេតុថា កាលក្នុងរជ្ជកាលនៃព្រះបាទសម្តេចហរិរក្សរាមាឥស្សរាធិបតី គេច្រើនយកនំនេះទៅដាក់ភ្ជាប់នឹងមែកឈើឬមែកឫស្សីដែលគេកាត់យកមកដោតលើកំណាត់ដើមចេក គេភ្ជាប់នំនេះតម្រៀបគ្នាស្រដៀងនឹងឈើមានផ្លែ… គេសន្មត់ឈ្មោះថានំផ្លែអាយគឺទុកដូចជាឈើដែលផ្លែនៅអាយ ពុំមែនផ្លែដែលគេបេះយកមកពីដើមឈើឯនាយទេ។
នំនេះក៏មានឈ្មោះមួយទៀតថា «នំកើតក្តី»ដែរ ដោយមានរឿងតំណាលថា កាលពីព្រេងនាយមានបុរសពីរនាក់អង្គុយស៊ីនំនេះជិតគ្នា, បុរសម្នាក់ពមនំនេះតាមទម្លាប់ ឯបុរសម្នាក់ទៀតខាំនំនេះចំពាក់កណ្តាល ទឹកស្តរខាងក្នុងក៏ធ្លាយបាញ់ត្រូវមុខបុរសម្នាក់, ស្រាប់តែបុរសនោះក្រោកឡើងដាល់តប់គ្នា ហើយក៏កើតជាការប្តឹងផ្តល់គ្នា ទើបចៅក្រមឲ្យឈ្មោះនេះថា «នំកើតក្តី» ចាប់ដើមតាំងពីកាលនោះមក។
ដូច្នេះ នំនេះក៏មានឈ្មោះបីយ៉ាងដូចដែលបានរៀបរាប់មកខាងលើ, ប៉ុន្តែនំកើតក្តីជាពាក្យសាមញ្ញ គេមិនសូវហៅទេ គេច្រើនហៅតែ នំបំពួនស្ករ និងនំផ្លែអាយ។ នំបំពួនស្ករជាឈ្មោះដើម ត្រឹមត្រង់តាមអត្ថន័យជាងឈ្មោះទាំងពីរ ពីព្រោះមានដុំស្ករត្នោតដែលគេដាក់បំពួនខាងក្នុងពិតមែន៕
ហេតុអ្វីមិនផ្ញើអោយបងយើងហូបផង!
ឆាប់ភ្លេចគ្នាម្លេះ!
បងអនឡៃរាល់ពេលទាំងអស់!
ជួបគ្នាថ្ងៃថ្មីលើទឹកដីឡានឆាង វ៉ាន់ពីម៉ៃឡាវ ណា….អាចម៍ផ្កាយ!
ទៅដល់ស្រុកខ្មែរហើយនៅនឹកឃ្លានផ្លែអាយទៀត!!?
ខ្ញុំឯនេះនឹកស្រុកខ្មែរសឹងងាប់ មិននឹងបានទៅផង!!
គ្មាននរណាភ្លេចបងឯងទេ… អរគុណសម្រាប់ជំនួយគ្រប់បែបយ៉ាងនៅលាវ… ហើយសុំទោសសម្រាប់ថ្ងៃដែលបងចាកចេញទៅ.. ខ្ញុំមិនបានជានៅក្បែរបងព្រោះខ្ញុំមិនចូលចិត្តមនុស្សមួយចំនួន អ៊ីចឹងទៅខ្ញុំមើលទៅដូចជារៀងឃ្លាតឆ្ងាយពីបង តែការពិតខ្ញុំមិនដែលភ្លេចបំណងល្អរបស់បងមកលើខ្ញុំទេ… ខ្ញុំចងចាំគ្រប់ពេល!
អរគុណសម្រាប់អ្វីគ្រប់យ៉ាង!!
កាលពីខ្ញុំនៅតូចមានតែ១០០រៀលទិញនំនេះហូប បានយ៉ាងឆ្ងាញ់មាត់ តែឥលូវនេះទោះមានលុយ១០០ដុល្លារ ក៏មិនដឹងត្រូវទៅទិញនៅទីណាដែរ គឺលែងមានអ្នកធ្វើលក់តាម៉ង។
ចេះនិពន្ឋរឿង ចេះធ្វើនំ ចេះ អីទៀតទេ ពិតជាអស្ចារ្យមែន។
ខ្ញុំធ្លាប់បានអ៊ីតម្តងកាលចេញពីរៀនយឺត!
ឆ្ងាញ់តើបង!
តែដូចជាមិនសូវជាជក់ចិត្តណាស់ណាទេ!
រីករាយបុណ្យចូលឆ្នាំថ្មីនឹងឈានចូលមកដល់ឆាប់ៗនេះ!
តែខ្ងុំលឺចាស់ថានំនេះឈ្មោះដើមហៅថានំសំលាប់ប្តី។
ស្រួលអ៊ីចឹង ប្រហែលខ្ញុំក៏អាចធ្វើបានដែរ។
អរគុណដែលជួយប្រាប់វិធីធ្វើ ។ ចាំមើលថ្ងៃណាទំនេរសឹមសាកធ្វើម្តង ។
វិធីធ្វើគ្មានអីពិបាកទេ គឺដំបូងយើងត្រូវមានគ្រឿងផ្សំដូចជា ម្ស៉ៅដំណើប២កញ្ចប់(ទិញស្រាប់ ព្រោះនៅស្រុកគេមិនងាយកិនទេ), ម្ស៉ៅខ្សាយ១កញ្ចប់, ស្ករផែនស្ករត្នោត, ដូងចាស់ស្ទើរទុំមួយ និងអំបិលមួយចិប។
វិធីធ្វើមានដូចតទៅ៖
- ដាក់ដាំទឹកក្នុងឆ្នាំងចោល និងកោសដូងឲ្យបានជាសរសៃវែងៗ។
- យកម្ស៉ៅដំណើបទាំង២កញ្ចប់មកលាយជាមួយម្ស៉ៅខ្សាយ១កញ្ចប់(បើដាក់ម្ស៉ៅដំណើបតែមួយកញ្ចប់ ត្រូវដាក់ម្ស៉ៅខ្សាយកន្លះកញ្ចប់ ព្រោះបើដាក់តែម្ស៉ៅដំណើបទទេ នំនឹងមិនទន់ស្វិតល្អទេ) ហើយយកអំបិលមួយចិប និង ទឹកក្តៅឧណ្ហៗមកលាយជាមួយ និងច្របាច់ច្របល់ចូលគ្នាទាល់តែក្លាយជាដុំម្ស៉ៅ ដែលទន់ល្មមលញ់បានហើយទុកចោលមួយអន្លើសិន។
- យកស្ករផែន(ស្ករត្នោត)មកកាត់ជាដុំតូចៗប៉ុនចុងកូនដៃ ឬធំជាងនេះបន្តិចទៅ តាមទំហំនំដែលចង់បាន។
- យកម្ស៉ៅដែលលាយស្រេចហើយនោះមកលញ់តូចៗប៉ុនមេដៃ ហើយយកស្ករដែលកាត់ជាដុំៗរួចនោះ មកដាក់កណ្តាលជាស្នូររួចលញ់ឲ្យមូលបង់ចូលទៅក្នុងទឹកដែលដាំពុះ ។ ធ្វើបែបនេះរឿយៗរហូតទាល់តែអស់ម្ស៉ៅនិងស្នូលស្ករ។
- នំដែលឆ្អិននឹងអណ្តែតឡើងលើ ដូច្នេះត្រូវយកវែកដួសនំដែលអណ្តែតនោះទៅដាក់ក្នុងទឹកត្រជាក់ រហូតទាល់តែនំអស់ពីឆ្នាំង។
- បើចេះធ្វើកន្តោងស្លឹកចេកកាន់តែល្អ ហើយស្រង់នំនោះប្រាំៗគ្រាប់ដាក់ក្នុងកន្ទោងចេក រួចចាប់រោយដូងដែលកោសរួចពីលើជាការស្រេច៕
គ្រាន់តែឃើញស្រក់ទឹកមាត់តែម្តង ។ ចុងភៅអាចប្រាប់់វិធីធ្វើបានទេ នឹងអាលខ្ញុំរៀនធ្វើដែរ ។ អរគុណទុកជាមុន
ស្រក់ទឹកមាត់តែម្តង
អាចម៍ផ្កាយចេះធ្វើនំបំពួនស្ករទៀត ខ្ញុំឃើញឃ្លានដែរហ្នឹង។ កាលយាយខ្ញុំនៅ គាត់ឧស្សាហ៍ធ្វើឲ្យស៊ីណាស់ ដល់ឥឡូវមិនដែលបានស៊ីដែរ។
នៅពីតូចចូលចិត្តញុំាណាស់ តែឥលូវមិនដឹងរកទិញនៅណាបានអាឆ្ងាញ់ទេ!
ហា ពីណាថាខ្ញុំអត់ស្គាល់…? ចូលចិត្តសឹងអីកាលពីក្មេង! អាឡូវនៅតាចូលចិត្តតាដែល…. អូ៎គ្រាន់តែស៊ីនំប៉ុណ្ណឹងក៏វ៉ៃគ្នាដែរ យ៉ាប់មែនតាម៉ង…
)