ជាប់ដៃ-ដៃល្អ ខែ កក្កដា 23, 2008
Posted by ផ្កាយNovels in ខ្ញុំគឺខ្ញុំ, ដំណឹងផ្សេងៗ, ទស្សនៈសង្គម.1 comment so far
ហ៊ឺ!… សុំដកដង្ហើមធំសិនចុះ មុននឹងចាប់ផ្តើមនិយាយ 
…គឺពីមុនខ្ញុំគិតថា នៅពេលឈប់សម្រាកពេលវ៉ាកងធំ៣ខែនេះ ខ្ញុំនឹងមានពេលទំនេរច្រើន ខ្ញុំអាចអានសៀវភៅ ខ្ញុំអាចសរសេររឿង និងអាចដើរកំសាន្តតាមទីជិតឆ្ងាយនានា តាមសេចក្តីត្រូវការ និងតាមគម្រោងការដែលបានគិតទុក។
តែមិនដូច្នោះអី ការងារថ្មីក៏មកដល់… 
ពេលវេលានៅតែមមាញឹក នៅតែចង្អៀតចង្អល់សម្រាប់ខ្ញុំដដែល។ ខ្ញុំបានជាប់ដៃរវល់វីវក់ជាមួយដៃល្អ… ដៃល្អឬGood Hands គឺជាអង្គការព្រះពុទ្ធសាសនាដើម្បីមនុស្សធម៌មួយ របស់ប្រទេសកូរ៉េ ដែលគេធ្វើការរួមគ្នាជាមួយប្រទេសកម្ពុជា ប្រទេសលាវ និងប្រទេសកូរ៉េផ្ទាល់ ដើម្បីបំរើការងារមនុស្សធម៌មួយចំនួនដូចជា៖ សង់សាលារៀន មណ្ឌលសុខភាព បណ្ណាល័យ បរិច្ចាគសៀវភៅ… ដល់ប្រជាជនក្រីក្រ នៅតាមទីជនបទដាច់ស្រយាលឆ្ងាយៗ។
នៅក្នុងនោះខ្ញុំក៏បានចូលរួមក្នុងការងារមនុស្សធម៌នេះ យ៉ាងសកម្មផងដែរ ដោយធ្វើការមួយអាទិត្យប្រាំថ្ងៃ ចាប់ពីម៉ោងប្រាបីព្រឹក រហូតដល់ម៉ោងប្រាំល្ងាច។ ការងាររបស់ខ្ញុំគឺ ធ្វើជាគ្រូបង្រៀនភាសាអង់គ្លេស-លាវ ដល់ក្មេងៗ, ជាបណ្ណារក្សថែរក្សាគ្រប់គ្រង និងផ្គត់ផ្គង់សៀវភៅដល់សាលានានា តាមបណ្តាញបណ្ណាល័យយុវវ័យ, ជាអ្នករៀបចំបន្ទប់អានអេកូឡូស៊ីបែបធម្មជាតិ… និងជាយុវជនស្ម័គ្រចិត្ត ចុះកម្មសិក្សាទៅ ទីជនបទឆ្ងាយៗ ដើម្បីសួរសុខទុក្ខប្រជាជនក្រីក្រ ដោយពិនិត្យនិងតាមដាន ការទទួលការអប់រំនៅតំបន់នោះ ដើម្បីស្រង់ស្ថិតិពីតម្រូវការរបស់ប្រជាជនក្រីក្រ ទាក់ទងនឹងការអប់រំ សុខភាព បរិស្ថាន…។
សរុបទៅឃើញថា មួយអាទិត្យខ្ញុំទំនេរបានតែពីរថ្ងៃទេ ដែលថ្ងៃទាំងពីរនេះ ខ្ញុំត្រូវទៅជួបអ្នកនិពន្ធលាវ រៀងរាល់ពីរសប្តាហ៍ម្តងទៀត ព្រោះខ្ញុំត្រូវត្រៀមសរសេររឿងខ្លី ប្រលោមលោក និងអត្ថបទសិល្បៈវប្បធម៌ ដែលទាក់ទងនឹងខ្មែរ ចុះផ្សាយក្នុងទស្សនាវដ្តី «ស្លឹករឹតមាស» របស់លាវផង។ 
ដូច្នេះឃើញថា ជីវិតខ្ញុំមមាញឹកខ្លាំងណាស់។ តែទោះជាយ៉ាងណាក៏ខ្ញុំពេញចិត្តនឹងអ្វីដែលខ្លួនបានធ្វើដែរ ថ្វីបើហត់នឿយខ្លាំង និងជាការងារស្ម័គ្រចិត្ត គ្មានប្រាក់ខែស៊ីក៏ដោយ។
«មនុស្សមិនមែនរស់នៅ ក្នុងពិភពផែនដីនេះ តែម្នាក់ឯងបានទេ។ ធ្វើមនុស្សមិនត្រូវអាត្មានិយម ធ្វើមនុស្សត្រូវញញឹមដើម្បីមនុស្សជាតិ។ ធ្វើមនុស្សត្រូវមើលឲ្យខ្ពស់សម្លឹងឲ្យឆ្ងាយ ហើយធ្វើជាមនុស្សមិនមែនរស់ដើម្បីតែខ្លួនឯង តែត្រូវរស់ដើម្បីអ្នកដទៃផងដែរ ព្រោះពាក្យថាមនុស្សមានន័យខ្ពស់ដូចមេឃ ធំទូលាយដូចដី។»
ដោយសារហេតុផលនេះ ពេលវេលាខ្ញុំជាមួយវើតប្រែស បែបត្រូវខកខានមិនបានផ្សាយ និងមិនបានចូលមកមើលឲ្យបានញឹកញាប់ទេ។ សម្រាប់កំហុសឆ្គង និងការរអាក់រអួលផ្សេងៗ សូមអ្នកទាំងអស់គ្នាខន្តីអភ័យទោសផង។ បាយ! បាយ!…
ផ្កាយNovels
