តោះរៀនធ្វើភាពយន្តទាំងអស់គ្នា! ខែ មីនា 5, 2008
Posted by ផ្កាយNovels in រៀនធ្វើកុន.26 comments
កើតមកមួយជាតិនេះ មិនដឹងជាជំពាក់កម្មអ្វីនឹងវិស័យភាពយន្តទេ ព្រោះតាំងពីតូចម្ល៉េះ ទោះអត់លុយយ៉ាងណាក៏ដោយ ក៏បេះពីមាត់បេះពីកដែរ ។មិនហ៊ានទិញនំស៊ីទេ គឺខំសន្សំទុក ទុកធ្វើអី? ទុកចូលមើលកុន ។មិនគ្រាន់តែប៉ុណ្ណឹងទេ ហ៊ានទៅដល់លួចខ្វេះកូនជ្រូកម៉ែ យកទៅមើលកុនទៀត ។ម៉ែវ៉ៃម្តងជាពីរដងមិនរាង រហូតដល់ថ្ងៃមួយ ម៉ែទៅផ្សារបាត់លួចខ្វេះទៀត… បានលុយភ្លាមញាត់កាប៉ាវខោ(ហោប៉ៅ) រត់ត្រុយទៅរោងកុន ។នេះបានគេថាទេវតាមានភ្នែក កូនកំហូចហ៊ានលួចលុយម៉ែ មកមើលកុន ទេវតាណាជួយ?… អរពេកបានលុយមកមើលកុន រត់ឆ្លងថ្នល់មិនមើលឡាន ឡានបុកជិតងាប់ម្តងទៅ!
ណ្ហើយ! ឈប់និយាយរឿងអកុសលនេះទៀតហើយ និយាយរឿងអកុអស់វិញម្តង! អស់អី?… គឺអស់ភាពរីកចម្រើន អស់ភាពទៅមុខនឹងគេហើយ«វិស័យភាពយន្តខ្មែរ»! បើយើងម្នាក់ៗនាំគ្នាបានតែរអ៊ូ បានតែថ្ងូរ ថាអន់ថាមិនកើត តែមិនព្រមនាំគ្នាជួយ នាំគ្នាចូកចែវ ឬរុញចម្លងទូកនេះឲ្យដល់ត្រើយនឹងគេ ។
ឥឡូវខ្ញុំបានសម្រេចចិត្តហើយថា ទោះខ្ញុំមិនធ្លាប់រៀនឬធ្វើកុននេះពីមុនមកក៏ដោយ ក៏ខ្ញុំនឹងខំតស៊ូព្យាយាមស្រាវជ្រាវរកឯកសារ មកសិក្សានិងរៀនបន្ថែមពីវិស័យនេះ ដើម្បីចែករំលែកចំណេះដឹងភាពយន្តខ្លះៗ ជូនដល់អ្នកដែលចាប់អារម្មណ៍ និងដើម្បីអនាគតត្រៀមខ្លួនក្លាយជា អ្នកនិពន្ធសេណារីយោឬអ្នកដឹកនាំរឿងតាមបំណងប្រាថ្នា ។
ដូច្នេះសូមកុំភ្លេចណា៎!… ចូលមកជាមួយខ្ញុំ ហើយចាប់ដៃគ្នាកសាង វិស័យភាពយន្តយើងឲ្យរីកចម្រើនឡើង ។
ឆាប់ៗនេះហើយ!!!
