Feeds:
ប្រកាស
មតិ

Archive for the ‘ភាព​យន្ត​ហូលីវូដ’ Category


ផ្កាយNoVeLs*– បើទស្សនា​បែបមិនវិភាគ ខ្សែភាពយន្ត​រឿង Mother! ២០១៧ គឺ​ជារឿង​​ដែល​និយាយ​ពីស្វាមី(សម្តែងដោយ លោក Javier Bardem) និង​ភរិយា (សម្តែង​ដោយ នាង Jennifer Lawrence) មួយ​គូ ដែល​រស់​នៅ​ក្នុង​ផ្ទះ​ធំ​មួយ​កណ្តាល​ព្រៃ។ ពួក​គេ​រស់​នៅ​ដោយ​​មាន​សុភមង្គល តែសុខៗ​ក៏មាន​ភ្ញៀវ​ដែល​​​មិន​ធ្លាប់ស្គាល់ (សម្តែង​ដោយ​លោក Ed Harris និង​លោកស្រី Michelle Pffeifer) ចូល​មក​ក្រឡុក​ជីវិត​គូស្រករ​អ្នក​ទាំង​ពីរ​ឲ្យ​ក្រឡាប់​ចាក់។ ពួក​គេរស់​នៅ​ក្នុង​ព្រៃ​​ឆ្ងាយ​ដាច់​​ពីគេ​ឯង​​ ​ក៏​ព្រោះ​​តែ​បុរសជាប្តីគឺ​ជាអ្នកនិពន្ធ​ដែលត្រូវការកន្លែង​ស្ងប់ស្ងាត់​ដើម្បី​សរសេរ​រឿង​​​។​ ថ្ងៃ​មួយ ​ក៏​មាន​ភ្ញៀវ​ដែល​មិន​បាន​អញ្ជើញ​មក​សុំ​ស្នាក់​នៅ​ផ្ទះ​នេះ​ ដោយ​យល់​ច្រឡំ​ថា​​ជា​សណ្ឋាគារ។ បុរស​ជាប្តី​​ផ្តល់​ការស្វាគមន៍​យ៉ាង​កក់​ក្តៅ តែ​ភរិយា​មិន​សូវ​ជា​ពេញចិត្ត​ប៉ុន្មាន​ទេ។ នៅពេល​ផ្ទះ​មួយ​ខ្នង​នេះ​ មាន​ភ្ញៀវ​ចូល​មកដល់​កាន់​តែច្រើន​ឡើងៗ ភាពចលាចល រញ៉េរញ៉ៃក៏តាម​មក​ដែរ ដោយ​ធ្វើ​ឲ្យ​ភរិយាកើត​ទុក្ខ​ពិបាកចិត្តជាលំដាប់។ ទីបំផុត​ វិនាសកម្មដ៏ធំ​​នឹក​ស្មាន​មិន​​ដល់​​ក៏​ផ្ទុះ​ឡើង!

ខ្សែភាពយន្ត​នេះ​ ផ្តើមរឿង​​ដោយ​បង្ហាញ​​ត្រង់​​​ឈុត​មួយ ​មាន​នារី​ម្នាក់​ឆេះ​ក្នុង​ភ្លើង​​មួយ​ភ្លែត រួច​​ក៏​កាត់​ចូល​ទៅ​​តួ​ប្រុស​​កំពុង​កាន់​​ត្បូង​​មួយ​គ្រាប់ធំដាក់​ទៅ​លើ​ទម្រ​ក្នុង​ផ្ទះ​។ ផ្ទះ​ដែល​​ត្រូវ​ភ្លើង​ឆេះ​មុន​នេះ ​ក៏​ចាប់​ផ្តើម​មាន​សភាព​ល្អ​ស្អាត​ឡើង​វិញ​ ហើយ​ក៏​លេច​រូបភរិយាកំពុង​គេង​នៅ​លើ​គ្រែ​ក្នុង​បន្ទប់​(កាល​ពី​ដំបូង​គ្មានទេ)។ ត្រង់​ឈុត​នេះ​គឺ​ចង់​បង្ហាញ​ពី​ «ព្រះ​បង្កើត​លោក» ដោយ​បុរស​ជា​ស្វាមី​តំណាង​ឲ្យ​​ព្រះ​ ចំណែក​ភរិយា និង​ផ្ទះ ប្រៀប​បាន​ជាភព​ផែនដី ឬ​ព្រះ​ម៉ែ​ធរណី (Mother Earth)។ សុភមង្គល​របស់​គូ​ស្វាមី​ភរិយា​មួយ​គូ​នេះកាលគ្រាដំបូង ប្រៀប​បាន​​នឹង​ភព​ផែន​ដី​ ​​ពេល​មិន​ទាន់​មាន​មនុស្ស​រស់​នៅ​ គឺ​ស្រស់ស្អាត​បរិសុទ្ធ​ខ្លាំងណាស់។

លុះ​​ថ្ងៃ​មួយ​ក៏​មាន​ភ្ញៀវ​ដែល​មិន​បាន​អញ្ជើញ​ បាន​មក​ដល់​ផ្ទះ​នេះ​។ បុរសចំណាស់​ម្នាក់​ដែល​យល់​ច្រឡំ​​ថា​ទី​នេះ​ជា​សណ្ឋាគារ​ បាន​មក​សុំ​ស្នាក់អាស្រ័យ​​មួយ​រយៈ។ នាង​ជាភរិយាហាក់​​ខ្លាច​រអា​ និង​មិន​ទុក​ចិត្ត​បុរស​ម្នាក់​នេះ​សោះ និង​កាន់​តែ​មិន​ពេញចិត្តថែម​ទៀត​ កាល​បើ​ឃើញ​បុរស​នេះ​ជក់​បារី​ក្នុងផ្ទះ​​​ដោយ​មិន​ខ្លាចចិត្ត ឬ​យល់​មុខ​ដល់​ម្ចាស់​ផ្ទះ​សូម្បី​តែបន្តិច​(ការជក់​បារី​ក្នុង​​​ផ្ទះ ប្រៀប​បាន​នឹង​ការ​បំពុល​បរិស្ថាន និង​ភព​ផែនដីទាំងមូល​)។ ប៉ុន្តែ​ស្វាមី​របស់​នាង​​ហាក់​ត្រូវ​ដង​ត្រូវ​ផ្លែ​នឹង​បុរស​នេះ​យ៉ាង​ខ្លាំង​ ព្រម​ទាំង​​ទទួល​ស្វាគមន៍​យ៉ាង​កក់​ក្តៅ។​ ទន្ទឹម​នឹង​នេះ ភ្ញៀវម្នាក់​​​នេះ​ក៏​បាន​ប្រាប់ថា គេ​គឺ​ជា​អ្នក​គាំទ្រ​ស្នាដៃ​តែង​និពន្ធ​របស់​បុរស​ជាស្វាមី​​យ៉ាង​ងប់ងល់​ម្នាក់ដែរ។

បើ​ប្រៀប​ធៀប​ចំណុច​នេះ ​ទៅ​នឹង​​រឿងរ៉ាវ​នៃ​ការ​បង្កើត​លោក​របស់​ព្រះ​  បុរសម្នាក់​នេះ​គឺ​ជា Adam នោះ​ឯង​។ តាម​គម្ពីរ​ប៊ីប ព្រះ​បាន​បង្កើត​អាដាម​ជា​មនុស្ស​ដំបូង​ និង​បាន​ផ្តល់​ក្តីស្រឡាញ់ ទីស្នាក់អាស្រ័យ​ ពោល​គឺ​ភព​ផែនដី(ក្នុង​រឿង​គឺ​ផ្ទះ)​ទាំង​មូល​ដល់គេ។ ព្រះស្រឡាញ់​អាដាមដល់ថ្នាក់​​អនុញ្ញាត​ឲ្យ​​គេ​ចូល​ទៅ​​ក្នុង​សួន​ Eden ដែលជាកន្លែង​ភ្ជាប់ភពផែនដី និងឋានសួគ៌ ប៉ុន្តែ​មាន​បម្រាម​មួយ​គឺ​ហាម​បេះ​ផ្លែ​ប៉ោម​ញ៉ាំ​។ មិនខុសពីក្នុង​រឿង​ បុរស​ជាស្វាមី​បាន​អនុញ្ញាត​​ឲ្យ​ភ្ញៀវ​ចំណាស់​របស់ខ្លួន ​ចូល​ទៅ​ក្នុង​បន្ទប់​ធ្វើ​ការ តែ​ហាម​មិន​ឲ្យ​ប៉ះ​ពាល់​ត្បូង​ពេជ្រ​ដែល​ដាក់​តាំង​នៅ​ទីនោះ​​ជាដាច់​ខាត។

មួយ​រយៈ​ក្រោយ​មក​ ភ្ញៀវ​ទី​២​ក៏​មកដល់។ នោះ​គឺ​ប្រពន្ធ​របស់​បុរស​ចំណាស់ ដែល​ជាភ្ញៀវ​ដំបូង​ ​។ នាង​មក​សុំ​ស្នាក់​អាស្រ័យ​នៅ​ទីនេះ​ជាមួយ​ប្តីដែរ ហើយ​បុរស​ជា​ម្ចាស់​ផ្ទះ​ក៏​អនុញ្ញាត​ដោយ​ក្តី​ពេញ​ចិត្ត​។ យាយប៉ិ​ម្នាក់​នេះ​ និស្ស័យ​មិន​សូវ​ល្អ​ប៉ុន្មាន​ទេ ចូលចិត្ត​និយាយ​ចាក់ដោត​ដល់​ភរិយា​ម្ចាស់​ផ្ទះ​ មាន​ពេលខ្លះ​ក៏​និយាយ​ដល់​រឿង​ស៊ីជម្រៅថែមទៀត ដូចជារឿងរោលរាល​នៅ​​លើ​គ្រែជាដើម។ មែនហើយ យាយ​ប៉ិ​ម្នាក់​​នេះ ​គឺ​តំណាង​ឲ្យ​នាង Eve នារីដំបូង​ដែល​ព្រះ​បង្កើត​​ឡើងដើម្បី​​ធ្វើ​ជា​ដៃគូរបស់​អាដាម​នោះ​ឯង​។

យាយ​ម្នាក់​នេះ ​ព្យាយាម​ចូល​ទៅ​បន្ទប់​ធ្វើ​ការ​របស់​បុរស​ម្ចាស់​ផ្ទះ ​ដែលមាន​ត្បូង​​ពេជ្រ​នៅ​ទី​នោះ​ ម្តងហើយម្តងទៀត តែ​ត្រូវ​ភរិយា​ម្ចាស់​ផ្ទះ​ហាម​ឃាត់​មុន​។ លុះ​ពេល​ម្ចាស់ផ្ទះ​ភ្លេច​ខ្លួន យាយ​នេះក៏​នាំ​ប្តី​ចូល​ទៅ​ក្នុង​បន្ទប់​នោះ ហើយ​ថែម​ទាំងធ្វើ​ឲ្យ​ត្បូង​ពេជ្រ​នោះ​ធ្លាក់​បែក​ថែមទៀត​។ បុរសម្ចាស់ផ្ទះខឹងសម្បារយ៉ាងខ្លាំង បាន​​យក​ក្តារ​មកដំ​បិទ​បន្ទប់​នោះ​លែង​ឲ្យ​នរណា​ចូល​ទៅ​ទៀត។ ​ត្រង់​ឈុត​នេះ គឺ​ប្រៀប​ធៀប​ពេល នាងអ៊ីវ នាំ​អាដាម​ទៅ​បេះ​ផ្លែ​ប៉ោម​ញ៉ាំ​ ខុស​នឹង​បម្រាម​ព្រះ ហើយ​ព្រះ​ក៏​ដាក់​ទោស​ពួកគេ​ មិន​ឲ្យ​ចូល​ក្នុង​សួនអេដែនទៀត​។

ក្រោយ​ពី​ហេតុ​ការណ៍ធ្លាក់បែក​​ត្បូង​ ភរិយា​ម្ចាស់ផ្ទះ​សង្ឃឹមថា ស្វាមីរបស់ខ្លួន​នឹង​ដេញ​ភ្ញៀវ​ទាំង​​ពីរ​ចេញ​។ តែ​ខុស​ពី​ការគិត​ ស្វាមីរបស់នាងបានអភ័យ​ទោស​ឲ្យ​ពួក​គេ​ ធ្វើ​ឲ្យ​នាង​អស់សង្ឃឹម​នឹង​ស្វាមី​របស់ខ្លួន​យ៉ាង​ខ្លាំង។ មិន​តែប៉ុណ្ណោះភ្ញៀវ​ទាំងពីរ​​ នៅតែ​ហ៊ាន​​មាន​អីៗ​នឹង​គ្នា​ដោយ​​បើក​ចំហ​នៅ​ក្នុង​ផ្ទះ​នេះទៀត​។ មិន​ខុស​ពី​នៅ​ក្នុង​គម្ពីរ​ប៊ីប បន្ទាប់​ពី​អាដាម និង​អ៊ីវញ៉ាំ​ផ្លែប៉ោម​ហាម​ឃាត់​ហើយ ពួក​គេ​ក៏​រួម​សង្វាស​​គ្នា​ បង្កើត​កូន​ពូន​ចៅ​នៅ​លើ​ភព​ផែនដី​នេះ​។ ថ្វី​បើ​ពួក​​គេធ្វើ​ខុស តែព្រះ​​នៅ​តែ​លើក​លែង​ទោស​ឲ្យ​ពួក​គេ ហើយ​អនុញ្ញាត​ឲ្យ​រស់​នៅ​បន្ត​លើ​ភពផែនដីដែលមិន​ទាន់​ប្រលូក​ប្រឡាក់​ដោយ​អំពើ​បាប​នានា។

នៅ​ឈុត​បន្ទាប់ យើង​ក៏​មាន​ភ្ញៀវ​ដែល​មិន​បាន​អញ្ជើញ​មក​ដល់​ផ្ទះ​នេះ​បន្ថែម​ទៀត។​ នោះ​គឺ​កូន​ប្រុស​ទាំង​ពីរ​​របស់​ប្តីប្រពន្ធ​ចំណាស់​នោះ​។ កូន​ប្អូន​​លេច​មុខ​មក​មុន ​និយាយ​ពីរឿង​កេរមរតក​ជាមួយ​ឪពុក​ម្តាយ​។ កូន​បង​មក​ដល់​ដោយ​កំហឹង​ឆេះឆួល​ និយាយ​ថា ​ឪពុក​របស់ខ្លួន​កើត​ជំងឺ​មហារីកជិត​ស្លាប់ និង​​បាន​បែង​ចែក​កេរមរតក​មិន​ស្មើ​ភាព​ ទើប​ធ្វើ​ឲ្យ​រូប​គេ​​ខឹងបែប​នេះ​។ ការ​ឈ្លោះ​ប្រកែក​គ្នា​កាន់​តែខ្លាំង​​ឡើង​ៗ​ រហូត​ទីបំផុត​កូន​បង​បាន​យក​វត្ថុ​រឹង​វាយ​ក្បាល​ប្អូន​រហូត​​ស្លាប់​ពេល​យក​ទៅដល់​មន្ទីរពេទ្យ​។ បើ​ស្មាន​មិន​ខុស​ ហេតុ​ការណ៍​នេះ​ក៏​មាន​កើត​ឡើង​នៅ​​ក្នុងគម្ពីរ​ប៊ីបដែរ តែខ្ញុំ​ពុំ​បាន​ស្រាវជ្រាវលម្អិត​ទើប​មិន​ដឹង​ថា​នរណាតំណាង​ឲ្យ​នរណា។

ហេតុ​ការណ៍​នេះ​ បាន​បន្សល់​​ទុក​នូវស្នាម​ឈាមដិត​ជាប់​នៅ​លើ​ក្តារ​ពុក​ក្នុង​​បន្ទប់​នោះ​ ​ទោះ​បី​ភរិយា​​ម្ចាស់​ផ្ទះ​ជូត​​យ៉ាង​ណា​ក៏​មិន​ជ្រះ​។ មិន​តែ​ប៉ុណ្ណោះ ​វា​បាន​ជ្រាប​ទៅ​ដល់បន្ទប់​​​ក្រោម​ដី​។ នៅ​ពេល​តួ​ឯកស្រី​វាយ​ទម្លុះ​ជញ្ជាំង​​ដែល​បិទ​ជាប់​នោះ​ក៏ឃើញ​ជារូងងងឹត​មួយ​។ ស្នាម​​ឈាម​ដែល​​ជូត​មិន​ជ្រះ​ ខ្ញុំ​គិតថាជានិមិត្តរូប​នៃ​អំពើបាប​របស់​មនុស្ស​ ចំណែក​រូង​ងងឹត​ក្រោម​ដី ​គឺ​ជា​ឋាន​នរក​ដែល​ទើប​តែបើក​ចំហ​ទ្វារ​រង់​ចាំ​ទទួល​មនុស្ស​ដែល​ប្រព្រឹត្ត​នូវអំពើ​បាប។

បន្ទាប់​ពី​ស្វាមី​ជា​ម្ចាស់​ផ្ទះ ​ត្រឡប់​មក​ពី​មន្ទីរពេទ្យ​ដែល​កូ​ន​ប្រុស​របស់​ភ្ញៀវ​បាន​ស្លាប់​នៅ​ទីនោះ​ នារី​ជា​ភរិយា​សង្ឃឹមថា តទៅនេះ​ផ្ទះ​របស់​នាង​នឹង​មាន​តែភាព​ស្ងប់​សុខតែ​ប៉ុណ្ណោះ ប៉ុន្តែ​​នាង​គិតខុស! ព្រោះ​ផ្ទះ​របស់​នាង​ត្រូវ​ប្រើ​ជា​កន្លែង​ប្រមូល​ផ្តុំ​សាច់ញាតិ​របស់​គ្រួសារសព​ ហើយ​គ្រប់​គ្នា​ក៏​មក​ធ្វើ​ពិធី​រំឭក​ដល់​វិញ្ញាណ​ក្ខន្ធសព​នៅ​ផ្ទះ​របស់​នាង​។ ​ ​ភ្ញៀវ​​​ជាច្រើនបាន​មក​ចូល​រួម​នៅ​ក្នុង​​ពិធី​នេះ ​ និង​មាន​សញ្ជាតិ​ផ្សេងៗ​គ្នា មាន​ទាំង​ស្បែកស និង​ស្បែកខ្មៅ មានទាំងអាស៊ី និង​អឺរ៉ុបពេញ​ផ្ទះ​របស់នាងស្ទើរ​តែគ្មាន​កន្លែង​អង្គុយ​។ ខ្លះ​ក៏អង្គុយ​នៅ​លើ​អាង​លាង​ចាន​ដែលនាង​ហាម​​ឃាត់​ ព្រោះ​វា​មិន​រឹង​មាំ និង​មិន​ទាន់​ជួស​ជុល​ហើយ។ តែភ្ញៀវ​អស់​នោះ​នៅតែរឹងចចេស​​ ប្រឹង​​ធ្វើ​ផ្គើនដាក់​​នាង​ ដោយ​លោត​ទន្ទ្រាំ​លើ​អាង​លាង​ចាន​នោះ​ទៀត​ រហូត​ទីបំផុត​ក៏​បាក់ និង​​ធ្លាយទុយោ​​ទឹក​បាច​សាច​ពេញ​ផ្ទះ​។ តួឯកស្រី​ខឹង​ច្រឡោត​យ៉ាង​ខ្លាំង ​ក៏​ស្រែកដេញ​ភ្ញៀវ​ទាំង​អស់​ឲ្យ​ចេញ​ពី​ផ្ទះនាង​។ ហេតុ​ការណ៍​នេះ ខ្ញុំ​គិតថា​ឆ្លុះ​បញ្ចាំង​ឲ្យ​ឃើញ​ពី​ការ​កើន​ឡើង​នៃ​ចំនួន​មនុស្ស​លោក​ដែល​មាន​សញ្ជាតិ​ផ្សេងៗ​គ្នារស់​នៅពេញ​ភព​ផែនដី ហើយ​បាន​​ប្រព្រឹត្ត​អំពើ​បាប​​រៀង​រាល់​ថ្ងៃ រហូតពេល​មួយ​ក៏​ត្រូវ​ព្រះដាក់​ទោស​​ឲ្យ​មាន​ទឹក​ជំនន់ ​ជន់​លិច​ភព​ផែនដី​(ធ្លាយ​ទុយោ​ទឹក) សម្លាប់មនុស្ស​អស់ជាច្រើន។ ហេតុការណ៍​លិច​ភព​ផែនដី​នេះ មាន​និយាយ​នៅ​ក្នុង​គម្ពីរ​ប៊ីប និង​ធ្លាប់ថត​ជាភាពយន្ត​ដោយ​អ្នកដឹក​នាំរឿងដដែល​នេះ​ផង​ដែរ។

ក្រោយ​ពី​ហេតុការណ៍​នោះ បុរស​ជាស្វាមី​ក៏​និយាយ​លួង​លោម​ភរិយា ​ក្នុង​ន័យ​សុំ​ការ​យោគ​យល់។ បន្ទាប់​ពី​យល់ចិត្ត​គ្នារួច​ ​ពួក​គេ​ក៏​បាន​រួម​ដំណេក​ជាមួយ​គ្នាក្នុង​រាត្រី​នោះ។ ព្រឹកឡើង​ ភរិយា​​ភ្ញាក់​ពី​ដំណេក​​ក៏​ប្រាប់ប្តីថា ខ្លួន​មាន​កូន​។ ប្រហែល​ជាមិន​បាច់​ប្រាប់​ទេមែនទេ ថា​កូន​នោះ​​​ជានរណា? មែន​ហើយ! កូន​នោះ​គឺ​តំណាង​ឲ្យ​ព្រះយេស៊ូវគ្រិស្ត​នោះ​ឯង​។ បន្ទាប់​ពី​ទទួល​ដំណឹង​​ល្អ​ពី​ភរិយា​ ​ស្វាមីដែល​ជា​អ្នក​និពន្ធ​នោះ​​ក៏​ទទួល​បាន​កម្លាំង​ចិត្ត​ ចាប់​ផ្តើម​​អង្គុយ​សរសេរ​កំណាព្យ ដែលខ្លួនទ័លគំនិត​​ខកខាន​សរសេរយូរ​ហើយ​នោះ​ រហូត​សរសេរ​ចប់ជាស្ថាពរ ក្នុង​ពេល​ដែល​ភរិយា​ជិត​សម្រាល​កូន​ល្មម។ បុរស​ជា​ប្តី​បាន​ផ្ញើ​កំណាព្យ​នោះ​ទៅ​ឲ្យ​រោង​ពុម្ព ហើយ​ទទួល​បាន​ការបោះ​ពុម្ពផ្សាយ​។ ពីរនាក់​ប្តីប្រពន្ធ​រំភើប​ចិត្ត​ជាខ្លាំង​ តែក្នុង​រាត្រី​ដែលពួក​គេ​បម្រុង​នឹង​​ធ្វើ​ពិធី​ឆ្លង​ភាព​ជោគជ័យ​នេះ មហាសោកនាដកម្ម​​ដ៏​អាក្រក់​​បំផុត ​ក៏បានកើត​ឡើងដែរ។ (*ឈុត​​ត្រង់​នេះគឺ​រន្ធត់ ព្រឺព្រួច តានតឹង និង​ថប់​ខ្យល់​យ៉ាង​ខ្លាំង តែ​ខ្ញុំ​គ្រាន់​តែ​សរសេរ​រៀបរាប់​ហេតុការណ៍​ប៉ុណ្ណោះ ពុំ​បានបង្ហាញ​អារម្មណ៍​ឲ្យ​ឃើញ​ដូច​ពេល​ទស្សនាកុន​ទេ)។

ពោល​ គឺ​នៅ​រាត្រី​ដែលពួក​គេបម្រុង​នឹង​រៀប​ចំ​ពិធី​ឆ្លង​ភាព​ជោគជ័យ​របស់ខ្លួន​នោះ ក៏ស្រាប់តែ មាន​​អ្នក​គាំទ្រ​ស្នាដៃ​និពន្ធ​របស់​បុរស​ជាស្វាមី​មក​កាន់​ផ្ទះ​នេះ​ជាបន្តបន្ទាប់ ដោយចាប់​ផ្តើម​ពី​ក្រុម​​តូចៗ​ រហូត​ច្រើនឡើងៗ ទាល់​តែណែន​ផ្ទះ​ និង​ពេញបរិវេណ​ជុំ​វិញ​ផ្ទះ​។ រឿង​បាន​បង្ហាញ​ទំនាស់​​បញ្ហា​កាន់​តែធំ​ឡើងៗ​។ អ្នក​គាំទ្រ​ទាំង​នោះហាក់​ងប់​ងល់ និង​ជឿ​ស៊ប់​លើ​បុរស​ម្ចាស់​ផ្ទះ​​យ៉ាង​ខ្លាំង​ រហូត​យក​ស្នាដៃ​នោះ​មក​ដាក់ស៊ុម​បូជា និង​ខ្លះ​ទៀត​ក៏​ជារូប​របស់​អ្នក​និពន្ធ​​តែម្តង រួច​​ពួក​គេ​ក៏​នាំ​គ្នាសូត្រ​ធម៌ និង​ស្រែក​ហ៊ោ ស្តាប់មើល​ទៅ​គួរ​ឲ្យ​ខ្លាច និង​មាន​សភាព​ដូច​ក្រុម​ជឿងប់ងល់​នឹង​លទ្ធិ​សាសនា​ណាមួយ​ដូច្នោះ។ មិន​តែ​ប៉ុណ្ណោះ អ្នក​ខ្លះ​ក៏​បន្លំ​លួច​សម្ភារៈ​ផ្សេងៗ​​នៅ​ក្នុង​ផ្ទះ ខ្លះ​ដណ្តើម​គ្នា វាយគ្នា និង​កាន់​តែ​សាហាវ​ឡើងៗ​ជាលំដាប់។ ទំនាស់​បញ្ហា​កាន់​តែបន្ថែមកម្តៅ មាន​ការបំផ្ទុះអាវុធ សម្លាប់​គ្នា និង​ចាប់​មនុស្ស​យក​ទៅឃុំ​ឃាំង រហូត​ជម្លោះ​​​​ប្រែ​​ក្លាយ​ជាសង្គ្រាមនៅ​ក្នុង​ផ្ទះទាំងមូល​តែម្តង។ ខណៈ​ដែល​ហេតុ​ការណ៍​​កំពុង​ចលាចល​នោះ​ តួស្រី​ក៏ស្រាប់តែឈឺ​ពោះ​ត្រៀម​ឆ្លង​ទន្លេដែរ។

មុន​នឹង​និយាយ​សាច់រឿង​បន្ត ខ្ញុំ​សូម​លើក​យក​ការប្រៀប​ធៀបត្រង់​ឈុត​ទាំង​​នេះ ​មក​បង្ហាញសិន។ ចាប់​​ផ្តើម​ពីអត្ថបទ​កំណាព្យ​របស់តួឯកប្រុស គឺ​ប្រៀប​បាននឹងទ្រឹស្តី ឬ​បទ​បញ្ញត្តិ​របស់​​ព្រះ​ ដែល​ទ្រង់​ប្រគល់​ទៅ​ឲ្យ​សាវ័ក​ដំបូងៗ​របស់​ព្រះ​អង្គ​ដើម្បី​ផ្សព្វ​ផ្សាយ​ទៅ​ដល់​​មនុស្ស​លោកផ្សេងៗ​ទៀត​ ដើម្បី​​ត្រង់​ត្រាប់​ស្តាប់​តាម មុន​នឹង​ការកើត​មាន​ព្រះគម្ពីរប៊ីប។ ចំណែក​សាវ័ក​​របស់​ព្រះអង្គ​ដែលបង្ហាញ​នៅ​ក្នុង​រឿង​នេះ គឺ​គ្មាន​នរណា​ក្រៅ​ពី​ម្ចាស់​រោង​ពុម្ព​ស្រី​ ដែល​ទទួល​​កំណាព្យ​របស់​តួ​ប្រុស​ យក​ទៅ​បោះ​ពុម្ព​ផ្សាយ​នោះ​ទេ។ ប៉ុន្តែ​មនុស្ស​លោក​ក្រៅពី​មិន​បាន​ត្រង់ត្រាប់ស្តាប់​តាម​ហើយ បែរជាយកវាទៅ​បូជា បង្កើត​ជាលទ្ធិ​ និង​សាសនា​ផ្សេងៗ​ទៅ​វិញ​។ មនុស្ស​នៅ​តែប្រព្រឹត្ត​អំពើ​បាប និង​​បំផ្លាញ​ធនធាន​ធម្មជាតិ​របស់​ភព​ផែន​ដី​(លបលួច​សម្ភារៈ​​ក្នុង​ផ្ទះ​) ដោយ​គ្មាន​ថ្ងៃឆ្អែតឆ្អន់ ហើយ​បង្កើត​ជម្លោះ​រហូត​រីកសាយ​ភាយ ​ក្លាយ​ជា​សង្គ្រាម​​ដែលពិភព​លោកសព្វ​ថ្ងៃ​បាន​ឆ្លងកាត់ និង​ត្រៀម​ដើម្បី​ឆ្លង​កាត់​សាជាថ្មី​។

ត្រឡប់​ចូល​ហេតុការណ៍​ក្នុង​រឿងវិញ​ បន្ទាប់​ពី​តួឯកស្រីឈឺ​ពោះ​ បុរសជាស្វាមី​ក៏​នាំ​ភរិយា​ជម្លៀស​​ទៅ​កន្លែង​សុវត្ថិភាព​ក្នុង​ផ្ទះ​​ដើម្បី​សម្រាលកូន​ ហើយ​នោះ​គឺ​បន្ទប់​ធ្វើ​ការ​របស់​បុរស​ជា​ប្តីដែលបានបិទចោលនោះ។ បន្ទាប់​ពី​សម្រាល​បាន​កូន​ប្រុស​ ពួក​គេ​ក៏​ទទួល​បាន​អំណោយ​ជាច្រើន​ពី​អ្នក​គាំទ្រ​ មាន​ទាំង​សម្លៀកបំពាក់ ក្រណាត់​កន្ទប ទឹក នំចំណី និង​កន្ត្រក​ផ្លែឈើ។ ​បើ​យើង​សង្កេត​ឲ្យ​ច្បាស់ កន្ត្រក​ផ្លែ​ឈើ​នោះ​ មាន​លក្ខណៈ​ដូចជាស្នូក​ ឬក្រោល​ចៀម​ដែល​ព្រះយេស៊ូវ​កើត​ដូច្នោះ​​ដែរ(ចាំមិនច្បាស់ព្រោះមិនមែនជា​គ្រិស្តបរិស័ទ)។

បន្ទាប់​ពី​កូន​កើត បុរស​ជាស្វាមី​មាន​បំណង​យក​កូន​ទៅ​ឲ្យ​អ្នក​គាំទ្រ​ ដែល​នៅ​ខាងក្រៅមើល តែ​ត្រូវ​ភរិយា​បដិសេធ​ដាច់​អហង្កា។ លុះពេល​នាង​ភ្លេច​ខ្លួន​ដេក​លក់​មួយ​ភាំង ប្តីក៏​លួច​យក​កូន​នោះ​ទៅ​ខាង​ក្រៅ​ឲ្យ​មហាជន​បាន​សាទរ។ តែ​ហេតុ​ការណ៍​នឹក​ស្មាន​មិន​ដល់​ក៏​បាន​កើត​ឡើង​! ហ្វូង​មនុស្ស​ទាំងអស់​នោះ​បាន​ហែក​សាច់​កូន​របស់​ពួក​គេជាចម្រៀកៗចែកគ្នាស៊ី និងថែម​ទាំង​វាយ​ធ្វើ​បាប​នាង​ជា​ម្តាយ​យ៉ាង​ទ្រោម​ខ្លួន​ទៀត​ ទម្រាំ​ប្តី​ចូល​មក​ឃាត់​ទាន់​។ អ្នក​ទាំង​ពីរ​ក្រៀម​ក្រំចិត្ត​យ៉ាង​ខ្លាំង តែបុរស​ជា​ស្វាមី​នៅ​តែ​ចិត្ត​ល្អ​ចិត្ត​ទូលាយ​ ប្រាប់​នាង​ឲ្យ​អភ័យ​ទោស​ដល់​ហ្វូង​មនុស្ស​ទាំង​នោះ តែនាង​ទ្រាំ​តទៅទៀត​លែង​បាន​ហើយ! នាង​បាន​រត់​ទៅ​​មាត់រូង​ងងឹត​ក្រោម​ដី​ វាយ​​​ទម្លុះ​ឲ្យ​ប្រេង​ធ្លាយ​ហូរ​ចេញ​មក ហើយ​បញ្ឆេះ​ភ្លើង​ដុត​ខ្លួន​ឯង​ និង​មនុស្ស​ទាំង​អស់​នៅ​ក្នុង​ផ្ទះ​​នេះ។ ទីបំផុត​ ផ្ទះ​ទាំង​មូលក៏​​បាន​ផ្ទុះ​ឆេះ​រលាយ​ក្លាយ​ជា​ផេះ​ផង់​។ ហេតុការណ៍​នេះ ​ប្រៀប​ធៀប​នឹង​ការមកកើត​​របស់ព្រះយេស៊ូវ​ ដែលដំបូង​ឡើយ​មាន​មនុស្ស ​​និង​សាវ័ក​ជា​ច្រើន​គោរពស្តាប់​បង្គាប់​ទ្រឹស្តី​ព្រះអង្គ តែ​ក្រោយ​មក​ ក៏​នាំគ្នាចាប់​ព្រះ​អង្គ​​សម្លាប់នៅ​លើ​ឆ្កាង​ឈើ​ជាដើម។ ទីបំផុត​ពិភព​លោក​ក៏រលាយ(ផ្ទះឆេះ) មនុស្ស​លោកស្លាប់អស់ និង​ចុះនរក(តួស្រីដុត​ភ្លើង​​នៅ​មាត់​រូង​ងងឹត)។ តែ​នៅ​កណ្តាលគ្រោង​ផ្ទះ​ដែល​ឆេះ​ម៉ដ្ឋ​នោះ​ យើង​ឃើញ​តួ​ឯក​ប្រុស​នៅ​​មាន​ជីវិត​​ កំពុង​បី​រាងកាយ​ភរិយា​ដែល​ឆេះសុស​សាច់​​ចេញ​មក។ នាង​នៅ​មាន​ដង្ហើម​ដក ​បុរស​ជាប្តី​ក៏​សុំ​ក្តី​ស្រឡាញ់​ចុងក្រោយ​ពី​នាង​​ ដោយ​ទម្លុះ​ទ្រូងខ្វេះ​យក​បេះដូងដ៏​បរិសុទ្ធ​​របស់​នាង​។ នៅ​ក្នុង​បេះដូងរបស់នាងមានដុំត្បូង​ដែល​យើង​ធ្លាប់​ឃើញ​កាល​ពី​ដំបូង។ បុរស​ជា​ប្តី​យកត្បូង​​នោះ​ទៅដាក់​តាំង​នៅ​លើ​ជើង​ទម្រ​ ផ្ទះ​ទាំង​មូល​ក៏​ចាប់​ផ្តើម​ត្រឡប់​មក​កាន់​សភាព​ដើម​វិញ​ ហើយ​ក៏​កើត​មាន​នារីស្រស់ស្អាត​ម្នាក់​កំពុង​ដេក​នៅ​លើ​គ្រែ​​ក្នុង​បន្ទប់​ដូច​កាល​ពី​ដើម​រឿងដែរ។ ត្រង់​ចំណុច​នេះ គឺ​បង្ហាញថា ព្រះ​បាន​បង្កើត​ភព​ផែនដីថ្មី​មួយ​ទៀត​ ចេញ​ពីសំណល់​​ភព​ផែន​ដីចាស់​ដែលបាន​រលាយ​។ រឿង​ក៏ចប់​ត្រឹម​នេះ ហើយ​ឮ​ចម្រៀង​មួយ​បទ ដែល​អាចធ្វើ​ឲ្យ​យើង​យល់​ពីសាច់រឿង​របស់​ភាពយន្ត​នេះ បាន​កាន់​តែ​ច្បាស់​​មួយ​កម្រិត​ទៀត​។ នោះគឺបទ The End Of The World របស់​តារាចម្រៀង SKEETER DAVIS ។

នេះ​គ្រាន់​តែជា​​ទស្សនៈ​យល់​ឃើញ​មួយ​ជ្រុង​​តូច​ប៉ុណ្ណោះ។ យើង​ក៏​អា​ច​វាយ​តម្លៃ​ទៅ​ផ្លូវ​ផ្សេងទៀត​បាន​ដូច​គ្នា  ដូចជា បញ្ហាអស្ថេរភាព​សង្គម​ និង​នយោបាយ របស់​​សហរដ្ឋអាមេរិក​នៅ​ក្នុង​អាណត្តិរបស់​លោក ដូណាល់ត្រាំ ជាដើម។ ចំណែក​និមិត្តរូប និងរូបារម្មណ៍​ផ្សេងៗ​ដែល​មាន​នៅ​ក្នុង​រឿង​នេះ​ មាន​ដូចជា៖ ត្បូង តំណាង​ឲ្យ​បេះដូងបរិសុទ្ធ ជា​និមិត្តរូបនៃពលិកម្ម និង​ការលះបង់ ដែលចុងបញ្ចប់រឿងក៏បង្ហាញពីភាពសំខាន់របស់វា។ វត្ថុស្មោកគ្រោកនៅ​ក្នុង​បង្គន់​ ជានិមិត្តរូបនៃ​អំពើ​អាក្រក់​។ សំឡេងចង្វាក់បេះដូង​នៅតាមជញ្ជាំង​ផ្ទះ ដែល​​ប្រែពណ៌ខ្មៅ​បន្តិចម្តងៗ ប្រៀប​ធៀប​នឹង​ការថយចុះ​នៃ​សីលធម៌សង្គម​…។

សរុប​មកMother! ជាខ្សែភាពយន្តបែបចិត្តវិទ្យា អាថ៌កំបាំង ព្រឺព្រួចដែល​និយាយ​ពី​ភាព​សាហាវ​យង់ឃ្នង​របស់​មនុស្ស​លោក​នាពេល​​បច្ចុប្បន្ន ដោយ​បាន​ឆ្លុះ​បញ្ចាំង​​តាមរយៈ​និមិត្តរូប​ផ្សេងៗ​​ ដែល​អ្នក​ដឹក​នាំរឿង​បាន​បញ្ចូលនៅ​​ក្នុង​សាច់រឿង​របស់​ខ្លួន ​ប្រកប​ដោយ​ភាព​វៃឆ្លាត​បំផុត​។ បើ​មើល​លំៗ រឿង​នេះគ្រាន់​តែ​​និយាយ​ពី​ទំនាក់​ទំនង​ប្តី​ប្រពន្ធ​នៅ​ក្នុង​សង្គម​គ្រួសារមួយ​ពេល​មាន​ភ្ញៀវ​មក​លេង​ផ្ទះ​ប៉ុណ្ណោះ។ តែ​នរណា​ទៅដឹងថា នៅ​ពី​ក្រោយ​រឿង​នេះ​ មាន​​គំនិត​បង្កប់​បែប​លទ្ធិសាសនា និងទ្រឹស្តី​​ចិត្តវិទ្យានិយម ដែល​អ្នកដឹកនាំរឿងបញ្ចូល​ក្នុង​នោះ​យ៉ាង​ស៊ីជម្រៅ​បំផុត។ ការ​ថត​រឿង​ដែល​បង្កប់​ដោយ​រូបារម្មណ៍​ខ្ពស់​បែប​នេះ ក៏​ល្មម​ធ្វើ​ឲ្យ​អ្នក​មើល​ឈឺ​ក្បាល ​វិលមុខ គិត​ចង់​បែក​សន្ទះ​ក្បាល ព្រម​ទាំង​ដក់ជាប់នូវអារម្មណ៍​ភ័យ ​ខ្លាច​ ស្រៀវ​ស្ញើប​អស់សរសៃវិញ្ញាណ​ រហូត​ស្ទើរ​ក្លាយជាសរសៃប្រសាទ គេង​មិន​លក់ ដល់​ទៅ​ប៉ុន្មាន​ថ្ងៃ​ជាប់ៗ​​គ្នា ព្រោះតែធ្វើ​ឲ្យ​អ្នក​មើល​យក​មក​គិត វិភាគ​ វាយតម្លៃបន្ថែម​លើ​សាច់រឿង​ទាំងមូល​។ រឿងចប់ តែអ្នក​មើល​ មិន​ព្រមចប់! បើ​សួរថា តើ​រឿង​នេះ​ល្អមើលទេ? ខ្ញុំ​ប្រហែល​ជា​ផ្តល់​ចម្លើយ​​មិន​បានទេ ព្រោះ​មនុស្ស​យើង​មាន​ចំណង់ចំណូលចិត្តខុសៗ​គ្នា។ តែ​បើ​សួរថា គួរមើលឬអត់? ខ្ញុំ​អាច​សួរ​ត្រឡប់ទៅវិញថា បើ​មិន​មើល ធ្វើ​ម៉េចដឹងថា គ្រប់​យ៉ាង​ដែលខ្ញុំ​និយាយ​នៅទីនេះ តើ​ពិតដែរឬទេ? ឬ​ការយល់​ឃើញ​របស់ខ្ញុំ ដូច​ការគិត​របស់អ្នក​ទាំងអស់គ្នាដែរឬទេ?

Advertisements

Read Full Post »


បើ​មិនទាន់​ត្រៀម​ខ្លួន​ទេ កុំ​ទិញ​សំបុត្រ​មើល ប្រយ័ត្ន​ Shock ស្លាប់កណ្តាលរោង!!

ផ្កាយNoVeLs*– Mother!​ ជា​ខ្សែភាពយន្ត​ថ្មី​បំផុត​របស់​អ្នក​ដឹក​នាំរឿង Darren Aronofsky ដែល​ជា​កំពូល​អ្នក​ដឹក​នាំរឿង​បែប​អាថ៌កំបាំង ​ប្លែកៗ​ ចម្លែក​ខុសគេប្រចាំហូលីវូដ។ ស្នាដៃ​លេចធ្លោរបស់លោក​មានដូចជា៖ រឿង Requiem For a Dream (តារាសម្តែង Ellen Burstyn បានចូលរួមដណ្តើម​ពានរង្វាន់អូស្ការផ្នែក​តារាសម្តែង​ស្រីឆ្នើម) រឿង The Wrestler (តារាសម្តែង Mickey Rourke និង​ Marissa Tomei បាន​ចូលរួម​ដណ្តើម​ពាន​រង្វាន់​អូស្ការ) រឿង Black Swan (តារាសម្តែង Natalie Portman បាន​ឈ្នះ​ពាន​រង្វាន់អូស្ការជាតារាសម្តែងស្រីឆ្នើម ចំណែក​ភាពយន្ត​បាន​ចូល​រួម​ប្រកួត​ពាន​រង្វាន់​អូស្ការ​ជាភាពយន្ត​ល្អ​បំផុត​ប្រចាំឆ្នាំ​) ។ រីឯរឿង Mother!​ ២០១៧ នេះវិញ មាន​​សុទ្ធ​តែ​តារា​លំដាប់កំពូលៗ​ចូលរួម​សម្តែង ដូចជា៖ នាង Jennifer Lawrence លោក Javier Bardem ដែល​អ្នក​ទាំង​ពីរ ​សុទ្ធ​សឹង​ធ្លាប់​ឈ្នះ​ពាន​រង្វាន់​អូស្ការដូចៗ​គ្នា។ ចំពោះ​តារា​សម្តែង​បន្ទាប់បន្សំ​ដូចជា លោក Ed Harris និងលោកស្រី Michelle Pfeiffer ក៏​សុទ្ធ​សឹង​ធ្លាប់​មាន​​ឈ្មោះ​ចូលរួម​ដណ្តើមពាន​រង្វាន់​អូស្ការដែរ។

Mother!​ និយាយ​ពីស្វាមី(សម្តែងដោយ លោក Javier Bardem) និង​ភរិយា (សម្តែង​ដោយ នាង Jennifer Lawrence) មួយ​គូ ដែល​រស់​នៅ​ក្នុង​ផ្ទះ​ធំ​មួយ​កណ្តាល​ព្រៃ។ ពួក​គេ​រស់​នៅ​ដោយ​​មាន​សុភមង្គល តែសុខៗ​ក៏មាន​ភ្ញៀវ​ដែល​​​មិន​ធ្លាប់ស្គាល់ (សម្តែង​ដោយ​លោក Ed Harris និង​លោកស្រី Michelle Pffeifer) ចូល​មក​ក្រឡុក​ជីវិត​គូស្រករ​អ្នក​ទាំង​ពីរ​ឲ្យ​ក្រឡាប់​ចាក់។

ទទួល​​ស្គាល់​​ថា ខ្លួន​ឯង​ភ្លាត់​ស្នៀត​ពេល​បាន​មើល​ត្រឹម Trailer របស់​រឿងនេះ ព្រោះដំបូង​គិតថា ជាប្រភេទរឿងដែល​មាន​ក្រុម​មនុស្ស​អាក្រក់​ចូល​ប្លន់ ឬ​រុក​រើ​ផ្ទះ​ធម្មតាៗ​ តែ​ធាតុ​​ពិត​​រឿង​នេះ​​​មិន​​ធម្មតា​ទាល់តែសោះ! បើ​អ្នក​គិតថា អ្នក​ដឹងថា​រឿង​​នេះ​និយាយអំពី​អ្វី ខ្ញុំ​ហ៊ាន​អះ​អាង​ថា អ្នក​គិត​ខុស​គ្រប់​យ៉ាង​! តាំង​ពីដើម​រឿង​រហូត​ដល់​ចប់​ អ្នក​នឹង​មិន​ដឹង​សោះ​ថា រឿង​នេះ​នឹង​នាំ​អ្នក​ទៅ​កាន់​ទីបញ្ចប់​បែប​ណា​​។ វា​ជា​ខ្សែភាពយន្ត​អាថ៌កំបាំង បែបចម្លែកៗ ​ប្លែក​​ខុស​គេ​ខុស​ឯង ចម្លែកបែប Art Movie ។ ខ្ញុំ​ធានាថា ទស្សនិកជន​ភាគច្រើន ច្បាស់ជាមិន​ចូលចិត្ត​ទេ ឬ​មើល​មិន​យល់​តែម្តង ព្រោះ​រឿង​នេះ​អាច​ជា​ប្រភេទរឿង Love It or Hate It Movie​ ដែល​អាច​មាន​ទស្សនិកជន​ស្រឡាញ់ និង​ស្អប់វា​ក្នុង​ពេល​តែមួយ​។ ប៉ុន្តែ​ចំពោះខ្ញុំ ខ្ញុំ​ស្រឡាញ់​ងប់​ងល់​នឹង​រឿងនេះខ្លាំងណាស់ បើ​ទោះ​ជា​មើល​ចប់ជិត​៤៨​ម៉ោង​ទៅហើយ តែ​អារម្មណ៍​ខ្ញុំ​នៅ​តែ​វិល​វិល​​ដិត​ដាម​នឹង​ហេតុការណ៍​ផ្សេងៗ​នៅ​ក្នុង​រឿងនេះដដែល។ រឿង​នេះ​ពិត​ជា​មិន​ធម្មតាសោះ​ឡើយ​​ ដ្បិត​​អាច​បក​ស្រាយ​បាន​ច្រើន​យ៉ាង​ ប្រែ​បាន​ច្រើន​ន័យ​ ​និង​ប្រៀប​ធៀប​បាន​​ច្រើន​ករណី​។

បើ​និយាយ​ពី​ទេព​កោសល្យ​សម្តែង​របស់​តួ​ក្នុង​រឿង​នេះវិញ ខ្ញុំ​សូម​ជូនម្នាក់ៗ​​១០​ពិន្ទុ ព្រោះ​គ្រប់​គ្នា​មិនថាតួឯក ឬ​តួ​បន្ទាប់​បន្សំ គឺ​សុទ្ធ​សឹង​សម្តែង​ចូល​តួ ​ចូល​អារម្មណ៍​បានយ៉ាង​​ល្អ​ឥត​ខ្ចោះ។ ប៉ុន្តែ​​តួ​ដែល​លេច​ធ្លោ​ជាង​គេនោះគឺគ្មាន​នរណាក្រៅពី​ Jennifer Lawrence នោះទេ។ នាង​សម្តែង​ជាតួនារី​ដ៏​ស្អាត​ស្អំ​ ស្រគត់​ស្រគំម្នាក់ ពី​​ចិត្ត​ត្រជាក់​ក្លាយ​ជា​ក្តៅ​​ឆាប​ឆេះដូច​កំសួល​​អគ្គី រហូត​​ផ្ទុះ​អារម្មណ៍​ដូច​បរមាណូ។ បើ​អាច​ទៅ​រួច​ ខ្ញុំ​ចង់​ឲ្យ​នាង​បាន​ចូល​រួ​ម​ដណ្តើម​ពាន​រង្វាន់​អូស្ការ​ជា​តារាស្រី​ឆ្នើម​សម្រាប់​ឆ្នាំ​ក្រោយ​ទៀត​​។ តាម​ដែលខ្ញុំ​ធ្លាប់​មើល​រឿង​របស់​នាង នេះគឺ​​ជា​ការ​​សម្តែង​ដែល​ល្អបំផុត​របស់នាង​។ ទេព​កោសល្យ​សម្តែង​ដ៏ប៉ិន​ប្រសប់​នេះ បាន​ធ្វើ​ឲ្យ​ទស្សនិក​​ជន​ដូច​ជា​ខ្ញុំ​ក្រៀម​ក្រំបេះដូង ​រហូតស្ទើរ​​រលាយ​ក្លាយ​ជាផេះ​ផង់​ដោយ​មិន​ដឹង​ខ្លួន​។

ចំណែក​សាច់​រឿង​ទាំង​មូល​វិញ ខ្ញុំ​មិន​អាច​ប្រាប់​ក្នុង​ពេល​នេះ​បាន​ទេ ព្រោះ​មិន​ទាន់​ចង់​ Spoil ចង់​ឲ្យ​គ្រប់​គ្នា​បាន​ទៅ​មើលសិន ចាំប្រាប់​សាច់រឿង​លម្អិត​ពេល​ក្រោយ​។ ពេល​នេះ​គ្រាន់​តែ​​ប្រាប់ថា រឿង​នេះ​នឹង​បង្វិល​ក្បាលអ្នក​មើល​ឲ្យ​វិល​ខួរ​ស្មានមិន​​ត្រូវ​។ ចង្វាក់​​រឿង​នៅ​ខាង​ដើម​​អាចដើរ​​យឺតៗ​​បន្តិច​ លុះ​ពេល​តួអង្គ Ed Harris និង​ Michelle Pfeiffer ចូល​មក​ដល់​ភ្លាម​ អ្នក​នឹង​ចាប់​ផ្តើមមួ​ម៉ៅ​ ក្តៅ​ក្រហាយ ​និង​ជិនឆ្អន់​ចំពោះ​​តួទាំង​​ពីរនាក់​នេះ​ ដូច​អារម្មណ៍​របស់​តួឯក​ស្រីដែរ។ ទំនាស់​រឿង​ចាប់​ផ្តើម​ក្តៅ​គគុក​បន្តិច​ម្តងៗ បន្ទាប់​មក ​ក៏​ចាប់​ផ្តើម​បន្ថយ​កម្តៅបន្តិច​មុន​ពេល​ដល់​ចំណុច​កំពូល​ ដែល​ធ្វើ​ឲ្យ​ខ្ញុំ​ហាមាត់​គាំងស្តូក​ (មិន​ដឹង​ថា​មាន​រុយ​​ហើរចូលឬអត់) ភាពរន្ធត់​តក្កមា ភាពសាហាវឃោរឃៅ ភាពចលាចល ​ធ្វើ​ឲ្យ​បេះ​ដូង​ខ្ញុំ​ញាប់ញ័រ រញ្ជួញ​គ្រប់​ឥន្ទ្រីយ៍វិញ្ញាណ​ ដល់​ថ្នាក់​មើល​ចប់ហើយអារម្មណ៍​ភ័យ​ រំជើបរំជួល​នៅ​តែដិត​ដាម​ជាប់​ខ្លួន​រហូត​។ គ្រប់​ប្លង់​គ្រប់​ឆាក​នៃ​រឿង​នេះ​នឹងដើរ​​តាម​តួអង្គ​ Jennifer Lawrence ទៅ​គ្រប់​ទី​កន្លែង​។ ពេញ​មួយ​​ផ្ទៃ​រឿង តួអង្គ​​ម្នាក់​នេះ​​មិន​ដឹង​ទេថា​មាន​រឿងអ្វី​កើត​ឡើង​។ ចំណែក​អ្នក​មើល​ក៏​មិន​ដឹង​ដូច​គ្នា ព្រោះ​អ្នក​ដឹក​នាំរឿង​ចង់​ឲ្យ​អ្នក​មើល បាន​មើល​ឃើញ​ហេតុ​ការណ៍​ក្នុង​​រឿង​នេះ​​តាម​ខ្សែភ្នែក​របស់​តួឯក​ស្រីដែរ។

សរុប​មក Mother! ជា​ខ្សែ​ភាពយន្ត​ប្រភេទ Art House ប្លែក​ខុស​គេដែល​មិន​ធម្មតា​មួយ​។ ជា​រឿង​ដែល​បក​ស្រាយ​បាន​ច្រើន​ន័យ​ ប្រៀប​ធៀប​បាន​ច្រើន​យ៉ាង​។ ជា​រឿង​ដែល​ប្រើ​រូបារម្មណ៍​ច្រើ​ន​ ដែលខ្ញុំ​ជឿថា​​នឹង​មាន​អ្នក​និយាយ ព្រម​ទាំង​វិភាគអំ​​ពី​វា​ពេញ​មួយ​ឆ្នាំ ទម្រាំ​សាប​រលាប​។ តែ​ទន្ទឹម​នឹង​នេះ​ វា​ក៏អាច​​ជា​រឿង What the F*ck ប្រចាំឆ្នាំ​២០១៧​នេះ​ផង​ដែរ ក៏ថាបាន។ អ្នកខ្លះ​អាចចូលចិត្ត អ្នក​ខ្លះ​អាច​ស្អប់​ ហើយ​ខ្ញុំ​ហ៊ាន​ធានាថា អ្នក​មើល​គ្មាន​ផ្លូវទាយ​សាច់​រឿងដឹងឡើយថា ទីបំផុត​រឿង​នេះ​នឹង​នាំអ្នក​ទៅ​ដល់​ណា។ បើ​មិន​ទាន់​ត្រៀមកាយ​ និង​ចិត្ត​វិញ្ញាណ​​​​គ្រប់​គ្រាន់​ដើម្បី​មើល​​​ទេ សូម​កុំ​ទាន់​ទៅ​មើល​ឲ្យ​សោះ បើ​មិន​ដូច្នោះ អ្នក​​ច្បាស់​ជាស្លុត​​ ​រាប់​អាទិត្យ​មិនខាន! ខ្ញុំ​ទៅ​មើល​​តាំង​ពី​ម្សិល​មិញ​ មក​ដល់ថ្ងៃនេះ ជិត​៤៨​​ម៉ោង​ហើយ​ តែខ្ញុំ​នៅ​តែ​​បំភ្លេច​ហេតុ​ការណ៍​នៅ​ក្នុង​រឿង​នេះ​មិន​បាន​ ដែល​រឿង​ប្រភេទ​នេះ ជា​រឿង​ដែល​មិន​ងាយ​នឹង​​បាន​មើល​ងាយៗ​នោះទេ។

ពិន្ទុ៖ មិនហ៊ានឲ្យ

Read Full Post »


តួអង្គក្នុងរឿង Beauty and the Beast

ផ្កាយNoVeLs*– ចង់ប្រាប់ថា មានសេចក្តីសុខយ៉ាងខ្លាំងដែលបានទស្សនារឿងនេះ គឺចូលតួ ចូល អារម្មណ៍យ៉ាងខ្លាំងទៅនឹងភាពពីរោះរណ្តំនៃបទចម្រៀង ដែលរៀបរាប់ដំណើររឿង ទាំងមូល។ បទចម្រៀងនីមួយៗមានភាពលេចធ្លោ ពីរោះ មានអត្តសញ្ញាណ និង រូបារម្មណ៍ដែលអន្ទងព្រលឹងអ្នកមើលឲ្យចូលតួ លង់ស្នេហ៍ ស្លុងអារម្មណ៍ចូលទៅកាន់ សម័យកាល ដែលរឿងរ៉ាវ BEAUTY AND THE BEAST កកើតឡើង។ Walt Disney បានយកចម្រៀងគ្រប់បទដែលមាននៅក្នុងគំនូរជីវចលមករៀបរាប់សាច់រឿងសាជាថ្មី ប៉ុន្តែនៅតែមិនថ្មី ព្រោះប្លង់ខ្លះគឺដូចគ្នាស្ទើរចាប់ដាក់តែម្តង។ កាយវិការ និងបទចម្រៀង នីមួយៗក្នុងរឿងនេះ ធ្វើឲ្យខ្ញុំមានអារម្មណ៍ដូចកំពុងទស្សនាល្ខោននិយាយបែបលោក ខាងលិច ដែលអាចនិយាយបានថា នេះគឺជាល្ខោន និយាយសុទ្ធសាធ ដោយគ្រាន់តែមិនមែនសម្តែងលើឆាក ប៉ុណ្ណោះ។

ទទួលស្គាល់ថា BEAUTY AND THE BEAST ដែលសម្តែងដោយមនុស្សនេះ មិនអាច ប្រៀបធៀបជាមួយគំនូរជីវចលបានទេ តែក៏ល្អនៅក្នុងកម្រិតមួយដែលអាចទទួលយក បាន ព្រោះខ្លឹមសាររឿងទាំងមូលគឺល្អស្រាប់តាំងពីដើមម្ល៉េះ ជាពិសេសតួស្រី Emma Watson សម្តែងជាតួ Belle បានយ៉ាងល្អឥតខ្ចោះ និងស្រស់ស្អាត ស័ក្តិសមជាតួអង្គ ក្នុងទេវកថា គឺប្រៀបដូចនាងកើតមកដើម្បីក្លាយជាតួអង្គ Belle តែម្តង។ ភាពពីរោះ រណ្តំនៃបទភ្លេង និងចម្រៀង ធ្វើឲ្យខ្ញុំស្តាប់ឡើងព្រឺរោម និងរំជួលអារម្មណ៍ស្ទើរ តែស្រក់ ទឹកភ្នែក ដ្បិតរំភើបពេក រំភើបដែលបានត្រេក ត្រអាលនឹងមនោសញ្ចេតនាដ៏ស៊ីជម្រៅ តាមរយៈបទភ្លេង ទំនុកច្រៀង និងពាក្យពេចន៍សន្ទនា ដែលពោរពេញដោយរូបារម្មណ៍ សិល្បៈ។

សុខ ស្រីមុំ តួនាងពៅ ក្នុងរឿង នាងពៅម្លិះលា

ចំពោះដំណើររឿងវិញ គ្មានអ្វីប្លែកថ្មីនោះទេ គ្រប់គ្នាប្រហែលជាធ្លាប់ដឹងខ្លះៗមកហើយ តាមរយៈគំនូរជីវចល។ ប៉ុន្តែសម្រាប់ខ្ញុំ រឿងនេះធ្វើឲ្យខ្ញុំនឹកដល់ខ្សែភាពយន្តខ្មែរជំនាន់ ឆ្នាំ៩០មួយគឺរឿង «នាងពៅម្លិះលា» ដែលមានសាច់រឿងស្ទើរតែដូចគ្នាទាំងស្រុងនឹងរឿងនេះ។ ខុសត្រង់ថា នៅក្នុងរឿងខ្មែរ តាដង្ខៅមានកូនស្រី៥នាក់ ពេលចេញទៅធ្វើជំនួញ កូនស្រីច្បង៤នាក់ សុំឪចង់បានប្តី ខុសតែស្រីពៅប្រាថ្នាចង់បានផ្កាម្លិះលា (#ផ្កាកុលាប)។ តាមផ្លូវតាដង្ខៅបានជួបយក្ស(#ចចក) រហូតបានទៅដល់វិមានអារក្ស (#សត្វកំណាច) និងបានលួចកាច់ផ្កាម្លិះលារបស់អារក្សទុកផ្ញើកូនស្រីពៅ។ តាដង្ខៅត្រូវ មានកម្មពៀរដល់ស្លាប់ ព្រោះលួចកាច់ផ្កាអារក្សដោយមិនបានសុំអនុញ្ញាត។ តាដង្ខៅ អាចឆ្លងផុតគ្រោះកាចនេះបាន លុះត្រានាំកូនស្រីព្រហ្មចារីយ៍មកបូជាជូនអារក្ស។ កូនស្រីពៅដឹងដូច្នោះ ក៏ធ្វើ ដំណើរមកជួបអារក្ស។ ដើម្បីបញ្ជាក់ថា ឪពុករបស់នាងបានរួច ផុតពីសេចក្តីស្លាប់ដូចការសន្យា អារក្សបានឲ្យនាងពៅមើលឃើញឪពុកតាមកញ្ចក់ទិព្វ ។ លុះនាងពៅនៅរួមរស់ជាមួយអារក្សបានមួយរយៈ អ្នកទាំងពីរក៏កើតមានសេចក្តី ស្រឡាញ់រវាងគ្នានឹងគ្នា។ មួយរយៈក្រោយមក ឪពុកនាងពៅក៏ធ្លាក់ខ្លួនឈឺដោយសារ ជរាភាព។ អារក្សបានអនុញ្ញាតឲ្យនាងពៅទៅមើលថែឪពុកក្នុងរយៈពេល៧ថ្ងៃ បើនាង មិនវិលវិញ អារក្សនឹងស្លាប់។ លុះរំលង៧ថ្ងៃ នាងពៅមកមិនទាន់ អារក្សក៏ស្លាប់មែន។ តែដោយសារអំណាចទឹកភ្នែកព្រហ្មចារីយ៍ និងក្តីស្នេហ៍ដ៏បរិសុទ្ធរបស់នាងពៅចំពោះ អារក្ស អារក្សក៏រស់ឡើងវិញ និងប្រែរូបជាព្រះរាជបុត្រដ៏ស្រស់សង្ហា។ សូមបញ្ជាក់ថា រឿង «នាងពៅម្លិះលា» របស់ខ្មែរ ផលិតនៅឆ្នាំ១៩៩៣ និពន្ធដោយ លោក ប្រាក់ ច័ន្ទមុន្នី ដឹកនាំរឿងដោយ លោក ម៉ៅ សំអាងណុប សម្តែងដោយ អារុណ រស្មី(អារក្ស) សុខ ស្រីមុំ(នាងពៅ) និង តារាសម្តែងល្បីៗនៅជំនាន់នោះ ជាច្រើននាក់ទៀត ដូចជា អម្ពរ ទេវី នារីរ័ត្ន គន្ធា ពិសិដ្ឋ ពិលិកា ច័ន្ទ សេរីរ័ត្ន ទេពរិន្ទដារ៉ូ ខៃ ប្រសិទ្ធិ សម តារា…។

ទេពរិន្ទ ដារ៉ូ និង ពិសិដ្ឋ ពិលិកា ក្នុងរឿង នាងពៅម្លិះលា

និយាយពីខ្សែភាពយន្តរឿង BEAUTY AND THE BEAST ឆ្នាំ២០១៧នេះវិញ គឺគេប្រើ សិល្ប៍វិធីរៀបរាប់សាច់រឿងបានល្អ តាមលំដាប់លំដោយងាយយល់ ងាយចាប់បាន ដោយមិនបាច់ប្រើខួរក្បាលគិតច្រើន។ រីឯ ពាក្យពេចន៍សន្ទនាក៏វិចិត្រដោយរូបារម្មណ៍ សិល្បៈ ដែលមួយម៉ាត់ៗ សុទ្ធតែមានន័យខ្លឹមសារ អប់រំ ប្រៀបធៀប ស្តាប់ហើយត្រូវតែ យកទៅគិត វិភាគ និងវាយតម្លៃ តាមការយល់ឃើញរៀងៗខ្លួន ពោលគឺពាក្យមួយ ម៉ាត់ៗសុទ្ធតែមានប្រយោជន៍។ ការវិវឌ្ឍរបស់តួអង្គ ការប្រែប្រួលបុគ្គលិកលក្ខណៈ និងការរៀនស្វែងយល់របស់តួអង្គនីមួយៗគឺល្អ មានហេតុមានផល ធ្វើឲ្យយើងស្លុង អារម្មណ៍ ចូលតួ និងជ្រួតជ្រាបនូវមនោសញ្ចេតនារបស់តួអង្គសំខាន់ៗបានយ៉ាងងាយ ដោយឥតប្រកែកបាន។ ជាក់ស្តែងយើងយល់អារម្មណ៍របស់តួអង្គ Belle ដែលសេចក្តី ស្នេហាបានកកំណើតឡើងបន្តិចម្តងៗ នៅក្នុងក្រអៅបេះដូងរបស់នាង ហើយយើងក៏ យល់ពីកាយវិការដ៏ទន់ភ្លន់របស់តួអង្គសត្វកំណាច ដែលបេះដូងគេកាន់តែទន់ជ្រាយ ទៅៗ បន្ទាប់ពីបានស្គាល់អ្វីដែលហៅថា ស្នេហាពិត។

តារាសម្តែង Emma Watson ស័ក្តិសមនឹងតួអង្គ Belle ខ្លាំងណាស់។ នាងជា Belle ដែលស្អាតបំផុត មានអត្តសញ្ញាណ មានភាពលេចធ្លោ មាននិស្ស័យចចេសរឹងរូស តែមានមន្តស្នេហ៍ឆាបឆក់គួរឲ្យស្រឡាញ់។ ចំណែកតួអង្គសត្វកំណាចដែលសម្តែង ដោយ Dan Stevens ក៏ទទួលស្គាល់ថា សង្ហា ទោះជាឃើញមុខពិតតែប៉ុន្មានឈុតក៏ ដោយ តែកាយវិការដែលសម្តែងតាមរយៈខ្សែភ្នែកនោះ គឺជាអ្វីដែលអត់សរសើរមិន បានពិតមែន។ រីឯតារាសម្តែង Luke Evans ដែលសម្តែងជាតួអង្គ Gaston ក៏សង្ហាមិន ធម្មតា សង្ហាបែបពិសពុល រូបកាយសង្ហាតែចិត្តអាក្រក់ ប៉ុន្តែក៏មានមន្តស្នេហ៍ឆាបឆក់ បេះដូងគួរឲ្យខ្លាច។ 😱😂😱😂

ចំណែកបច្ចេកទេសប្រើក្រាហ្វិកកុំព្យូទ័របញ្ជាឲ្យទៀន នាឡិកា ប៉ាន់តែ ពែងតែ ដើរ បាន និយាយបាន… ចាត់ទុកជាធាតុដ៏សំខាន់មួយ ដែលធ្វើឲ្យរឿងទាំងមូលកាន់តែ គួរឲ្យចង់មើល ព្រោះក្រាហ្វិកល្អ សម ស្តែង ពិសេសតួអង្គវត្ថុទាំងនោះមានបុគ្គលិក លក្ខណៈច្បាស់លាស់ មិនភ្លាវ និងសុទ្ធតែគួរឲ្យស្រឡាញ់។ នេះមិនទាន់និយាយពី ការរៀបចំឆាក ក្រាហ្វិកប្រាសាទ និងការច្នៃម៉ូដសម្លៀកបំពាក់នៅក្នុងសម័យកាល ដែលរឿងបានកើតឡើងផង។

សរុបមក BEAUTY AND THE BEAST គឺជាខ្សែភាពយន្តមួយដែលមិនគួរមើលរំលង សម្រាប់យុវវ័យទាំងឡាយ ទាំងអ្នកដែលកំពុងមានស្នេហា និងមិនទាន់មានស្នេហា ឬសូម្បីតែអ្នកស្រឡាញ់ការសិក្សា ការរៀនសូត្រ ពិសេសស្រីៗដែលចូលចិត្តអានសៀវ ភៅ អានប្រលោមលោក… ពេលទស្សនារឿងនេះចប់ ស្នេហានឹងកកើតឡើងដោយ ឯងៗ ពេញក្រអៅបេះដូងមិនខានឡើយ 😘😘 ។ គ្រប់គ្នានឹងមិនស្តាយលុយទេ សូម្បី តែមួយសេន ព្រោះគ្រាន់តែទៅអង្គុយមើលមុខតួសម្តែងស្អាតៗ សង្ហាៗ និងស្តាប់ ចម្រៀងពីរោះៗ ក៏លើសតម្លៃសំបុត្រទៅហើយ! ចុះទម្រាំតែគិតពីតម្លៃនៃខ្លឹមសាររឿង ទាំងមូល បូករួមទាំងទេពកោសល្យសម្តែងដ៏ល្អឥតខ្ចោះរបស់តួអង្គនីមួយៗទៀត? ខ្ញុំ ជឿថា អ្នកដែលចំណេញកប់ក្តោងគឺទស្សនិកជន!!! 😉😉 មួយទៀត បើអ្នកទាំងអស់គ្នា មានពេលវេលាគ្រប់គ្រាន់ កុំភ្លេចរកមើលរឿង «នាងពៅម្លិះលា» របស់ខ្មែរដែលមាន នៅក្នុងយូធូបស្រាប់ ហើយកុំភ្លេចមកនិយាយប្រាប់វិញផង ថារឿងទាំងពីរដូចគ្នា និង ខុសគ្នាដូចម្តេចខ្លះ?

Read Full Post »


Maleficent-Poster_Archphkai

ផ្កាយ​NoVeLs*– ល្ងាច​ថ្ងៃ​ម្សិល​មិញ​ ក្រោយ​ពី​បាន​ចិញ្ចឹម​ចិត្ត​ថា​នឹង​មើល​រឿង​ Maleficent តាំង​ពី​យប់​​ម្សិល​ម្ង៉ៃ​ ខ្ញុំ​ក៏​បាន​​​ទៅ​មើល​​រឿងតាម​ភាព​ល្បី​តៗ​គ្នា​ពីមាត់​មួយ​ទៅ​មាត់​មួយ​។ ម្សិល​មិញ​ភ្លៀង​ខ្លាំង​ណាស់ តែ​ខ្ញុំ​ពុំ​មាន​​ក្តី​ព្រួយ​បារម្ភ​ថា នឹង​ខក​ខាន​ពុំ​បាន​មើល​នោះទេ ព្រោះ​កន្លែង​ធ្វើការ​នៅ​ជិត​លេជេន ស៊ីធីម៉ល​ស្រាប់​ ហើយ​ម្យ៉ាង​ខ្ញុំ​ជឿ​ថា មនុស្សសំខាន់​​ម្នាក់ដែល​នឹង​ត្រូវ​មក​អង្គុយ​មើល​កុន​ទន្ទឹម​ខ្ញុំ​ នឹង​មក​មើល​ដែរ បើ​ទោះ​បី​ជា​ត្រូវ​ជិះ​ម៉ូតូ​កាត់​ភ្លៀង​ កាត់​ទឹក​ស្ទះ​លូ យ៉ាង​ណាក៏ដោយ។​ 😀

ភ្លៀង​ពុំ​ធ្លាប់​ជា​ឧបសគ្គ​សម្រាប់​ខ្ញុំ​តាំង​ពីណាពីណី​មក​ទៅ​ហើយ​។ ផ្ទុយ​ទៅវិញ ថ្ងៃ​ណា​ដែល​មាន​ភ្លៀង ​គឺ​ជា​ថ្ងៃ​ដែល​ព្រះ​អាទិទេព​ប្រោះ​ព្រំ​ពរ​ជ័យ​ដល់​​ខ្ញុំ​។ ឡើង​ជណ្តើរ​យន្ត​បណ្តើរ​ ខ្ញុំ​ផ្ញើសារ​សួរ​រក​ដៃ​គូ​បណ្តើរ​ មិន​ដឹង​ថា​គេ​មក​ដល់​ហើយ​ឬនៅ? ម៉ោង​ជិត​៧​ល្មម កុន​ជិត​ចាប់​ផ្តើម​បញ្ចាំង​ហើយ​ តែ​ខ្ញុំ​នៅ​​តែ​រក​អ្នក​ដែល​ត្រូវ​មក​មើល​ជាមួយ​ខ្ញុំ​មិន​ឃើញ​។ មិន​តែ​ប៉ុណ្ណោះ​នៅ​ឆ្លៀត​ផ្ញើ​សារ​​ដែល​ឃើញ​ហើយ​ចង់​តែ​ខោក​មួយ​ក្រញរ​​ថា​ [Want to find me?] ហាសហា… កំពុង​តែ​ត្រហេប​ត្រហប​ដក​ដង្ហើម​មិន​ចង់​ដល់​គ្នា​ផង​ នៅ​ឆ្លៀត​មក​នាំ​ឯង​លេង​បិទ​ពួន​ទៀត! ឡុលលលល…

និយាយ​ដូចជា​ក្រៅ​សាច់​រឿង​ពេក​ហើយ ឥឡូវ​ចូល​ដល់​រឿងស៊ីជម្រៅ​វិញ​ម្តង​។ សំបុត្រ​កុន​ ១​សន្លឹក​តម្លៃ​ ៥$ ព្រោះ​ជា​ប្រភេទ​រឿង​ 3D គ្មាន​ 2D លក់​ទេ(ចេះ​រក​ស៊ី​គ្រាន់​បើ ព្រោះ​ដឹង​ថា អ្នក​មើល​ភាគ​ច្រើន​នឹង​រើស​យក​ 2D បើ​មាន​ជម្រើស) ដូច្នេះ​២សំបុត្រ​ តម្លៃ​ ១០$ តែ​មាន​កាតATMរបស់​ធនាគារ​ បញ្ចុះ​១០% ដូច្នេះ​សំបុត្រ​មើល​ម្សិលមិញ​គឺអស់​៩$។ ទិញ​សំបុត្រ​បណ្តើរ​ គិត​ក្នុង​ចិត្ត​បណ្តើរ​ថា បើ​មាន​សំបុត្រ​2D ពិត​ជា​ចំណេញ​លុយ​បានច្រើន។ តែ​ខ្ញុំ​សូម​បញ្ជាក់​នៅ​ត្រង់​នេះ​ឲ្យ​ហើយថា ខ្ញុំ​ពុំ​មាន​ចិត្ត​នឹក​ស្តាយ​សូម្បី​តែ​មួយ​សេន ក្រោយ​ពីទស្សនា​រឿង​នេះ​ចប់!

ភាពយន្ត​រឿង​ Maleficent គឺ​ជា​ការ​ដក​ស្រង់​យក​ផ្នែក​ ឬ​ចម្រៀក​ដ៏​តូច​មួយ​នៃ​ទេវកថា​រឿង ​Sleeping Beauty មក​និទាន​ឡើង​វិញ​។ ចំណុច​នេះ​បង្ហាញ​ថា ភាព​យន្ត​ និង​ប្រលោមលោក ឬ​អក្សរ​សិល្ប៍​រឿង​ គឺ​មាន​វិវឌ្ឍន៍​​ដូច​គ្នា​ ដោយ​គ្រាន់​តែ​យើង​ចេះ​ច្នៃ និង​ប្រឌិត​អ្វី​ដែល​ថ្មី​ប្លែក​មិន​ឲ្យ​ដូច​អ្នក​ដទៃ​។ Sleeping Beauty រឿង​ដើម អ្នក​និពន្ធ​ប្រើ​ POV (Point of View) លើ​តួ​អង្គ ព្រះ​នាង អារ៉ូរ៉ា(Aurora) ឬ ព្រះ​នាង​ Sleeping Beauty ប៉ុន្តែ​រឿង​ Maleficent អ្នក​និពន្ធ​ប្រើ ​POV ផ្តោត​លើ​តួអង្គ​ មេមត់ ម៉ាលីហ្វីស្ហិន (Maleficent)។ តាម​រយៈ​សិល្ប៍វិធី​នេះ បង្ហាញថា តួ​អង្គ​នៅ​ក្នុង​រឿង​ប្រឌិត​ គឺ​ប្រៀប​ដូច​នឹង​ជីវិត​​ក្នុង​សង្គម​មនុស្ស​ជាក់​ស្តែង​ដែរ ពោល​គឺ​នរណាៗ​ក៏​មាន​សិទ្ធិ​សម្រេច​ និង​កំណត់​គោល​ដៅ​ជីវិត​របស់​ខ្លួន​ឯង​បាន​ដូចៗ​គ្នា បាន​ន័យថា នរណាៗ​ក៏​អាច​ក្លាយ​ជា​តួឯកបាន​​ ដោយ​គ្រាន់​តែ​ខ្លួន​យើង​ផ្តល់​តម្លៃ​ឲ្យ​ខ្លួន​យើង ឬ​ ខ្លួន​យើង​ធ្វើ​ខ្លួន​ឲ្យ​អ្នក​ដទៃ​ផ្តល់​តម្លៃ​ឲ្យ​។ មើល​ចុះ សូម្បី​តែ​តួស្រី​មេមត់​​ចិត្ត​អាក្រក់​ក្នុង​រឿង Sleeping Beauty ក៏​អាច​ក្លាយ​ជា​តួឯក​បាន ចុះ​​ទម្រាំ​មនុស្ស​គ្រប់​គ្នា​ ហេតុ​អ្វី​ធ្វើ​មិន​បាន? 😀

និយាយ​ទៅនិយាយ​មក មាន​អារម្មណ៍​ថា ដូច​ជា​ក្រៅសាច់​រឿង​ដដែល​ 😛 ។ តែសូម​បញ្ជាក់ថា កថា​ខណ្ឌ​ខាង​លើ មាន​អត្ថប្រយោជន៍​ចំពោះ​ប្រិយ​មិត្ត​ណា​ដែល​ចង់​ក្លាយ​ជា​អ្នក​និពន្ធ​។​​ ជា​ថ្មី​ម្តង​ទៀត ភាពយន្ត​រឿង​ Maleficent និយាយ​ពី​អាថ៌​កំបាំង​នៅ​ពី​ក្រោយ​ខ្នងនៃ​​ភាព​សាហាវព្រៃ​ផ្សៃ​របស់​ស្រី​មេមត់​​នៅ​ក្នុង​រឿង​ Sleeping Beauty ពី​មូល​ហេតុ​ដែល​នាំ​ឲ្យ​នាង​ក្លាយ​ជា​មនុស្ស​ចិត្ត​អាក្រក់​ គ្មាន​បេះ​ដូង​ ស្អប់ ហើយ​ចង​គំនុំ​នឹង​ក្មេង​ស្រី​​ អារ៉ូរ៉ា(Aurora) បុត្រី​របស់​ស្តេច ស្តេហ្វិន(Stephan) ។ មិន​ចង់​និយាយ​ច្រើន​ទេ​ តែ​ដើម្បី​មើល​រឿង​នេះ​ងាយ​យល់ គ្រប់​គ្នា​គួរ​តែ​ស្វែង​រក​រឿង Sleeping Beauty ជាគំនូរជីវចលមើល​សិន​ក៏​បាន ទោះ​បី​មិន​បាន​ប្រាប់​អ្វី​ច្រើន តែ​នឹង​ធ្វើ​ឲ្យ​ការ​ទស្សនារឿង Maleficent កាន់​តែ​ជក់​ចិត្ត និង​មិន​មាន​ចម្ងល់​ពេល​កំពុង​មើល​។

ប៉ុស្ត័រគំនូរជីវចលរឿង Sleeping Beauty

ប៉ុស្ត័រគំនូរជីវចលរឿង Sleeping Beauty

ចំណុច​មួយ​ដែល​ធ្វើ​ឲ្យ​ខ្ញុំ​រំជួលចិត្ត​នៅ​ក្នុង​រឿង​នេះ​គឺ​ ពេល​ដែល​តួស្រី​មេមត់​ Maleficent និយាយ​ថា [យើង​សុំ​ដក​បណ្តាសាវិញ…] ពាក្យ​នេះតារាសម្តែង​​ អែនជូលីណា ជូលី និយាយ​ដោយ​អួល​ដើម​ក ​​រំជួលចិត្ត​រក​ថ្លែង​ពុំ​បាន ហើយ​បើ​និយាយ​ពី​ទឹក​មុខ​ សម្តី​សំដៅ​ការ​សម្តែង​ មិន​បាច់​និយាយ​ទេ តារា​លំដាប់​កំពូល​ពិភព​លោក​រូប​នេះ​ ពុំ​មាន​ចំណុច​ឆ្គាំ​ឆ្គង​សូម្បី​តែ​០,០១% ។ គ្រាន់​តែ​ឮ​ពាក្យ​នេះ​ភ្លាម(យើង​សុំ​ដក​បណ្តាសា!) ខ្ញុំ​ភ្ញាក់​ក្រញាង​ រំជួល​ចិត្ត​ផង រំភើប​ផង​ ហើយ​ទឹក​ភ្នែកក៏ហូរ​ចេញ​មក​តិចៗ​។ មិន​មែន​​កម្សត់​ មិន​មែនអ្វី​ទាំង​អស់ តែ​ជា​អារម្មណ៍​រំជួល​ រំភើប​មួយ​ដែល​រក​អ្វី​មក​​ថ្លែងពុំ​បាន​​។ បន្ទាប់​ពី​សម្តី​នេះ​ចប់ បណ្តាសា​ក្នុង​អតីតកាលក៏​ឮ​រណ្តំ​ក្នុង​ត្រចៀក​នាងជាថ្មី​ [បណ្តាសា​នេះ​នឹង​ស្ថិត​នៅជា​និរន្តរ៍!] សំឡេង​នេះ​ ធ្វើ​ឲ្យ​មេធ្មប់​ចិត្ត​កំណាចទប់​ទឹក​ភ្នែក​ខ្លួន​ឯង​មិ​នបាន ហើយ​ពេល​នោះ​យើង​​ឃើញ​ថា បេះ​ដូង​​របស់​ស្រី​ចិត្ត​ឃោឃៅ​នេះ​ប្រែ​ក្លាយ​ជា​ទន់​ជ្រាយ​​ស្ទើរ​រលាយ​​ជា​ផេះ​ផង់។

នាង​ចាំ​ថា បណ្តាសា​របស់​នាង​អាច​ដោះ​បាន​លុះ​ត្រា​តែ​ ព្រះ​នាង​អារ៉ូរ៉ា(Aurora) បាន​ទទួល​ការ​ជម្ពិត​​ថើប​ពី​ស្នេហ៍ពិត។ តែ​លើ​លោក​នេះ​មាន​ស្នេហា​ពិត​មក​ពីណា? នេះ​ជា​សេចក្តី​បារម្ភ​របស់​នាង​។ សេចក្តី​សង្ឃឹម​តែ​មួយ​ គឺ​ស្នាម​ថើប​ពី​ព្រះ​រាជបុត្រហ្វីលីព(Phillip)​ ដែល​យើង​ធ្លាប់​ដឹង​តាម​រយៈ​រឿង​ Sleeping Beauty រួច​មក​ហើយ​ថា នៅ​ពេល​ដែល​ព្រះ​រាជបុត្រ​ថើប ព្រះ​នាង​នឹង​ភ្ញាក់​ដឹង​ខ្លួន​ឡើង​វិញនៅ​ចុង​បញ្ចប់​រឿង​​។តែ​សាច់​រឿងថ្មី​​នេះមិន​ចប់​ត្រឹម​នេះ​ទេ ហើយ​​​ខុស​ពីមុនដូច​បាតដៃ​ និង​ខ្នង​ដៃ​​… ​នៅ​ពេល Maleficent នាំ​ព្រះ​រាជ​បុត្រ​ទៅ​ឲ្យ​ថើបព្រះនាង​ អារ៉ូរ៉ា(Aurora) នាង​នៅ​តែ​មិន​ដឹង​ខ្លួនដដែល​។ ខ្ញុំ​ជឿ​ថា ប្រិយ​មិត្ត​​ខ្លះ​មិន​សូវ​ចាប់​អារម្មណ៍​ទេ ហើយ​ក៏​មិន​ដឹង​ដែរថា ហេតុ​អ្វី​បាន​ជា​រឿង​នេះ​​ដូរ​សាច់​រឿង​ទៅ​ជា​ដូច្នេះ​? តាម​ពិត​ចុង​បញ្ចប់​របស់​រឿង​បាន​បញ្ជាក់​ច្បាស់​ណាស់ តែ​ទស្សនិកជន​ភាគ​ច្រើន​ធ្វើ​ប្រហែស​ ព្រោះ​វា​ជា​សម្តីចុង​ក្រោយ​ ដែលម្នាក់ៗ​គិត​ថា មិ​នសំខាន់។ តើ​នោះ​ជាអ្វី? ខ្ញុំ​នឹង​ប្រាប់​នៅ​ប្រយោគ​ចុងក្រោយ! 😀

បន្ទាប់​ពី​ព្រះ​អង្គម្ចាស់​ហ្វីលីព(Phillip)ថើប​ហើយ ព្រះ​នាងអារ៉ូរ៉ា(Aurora) នៅ​តែ​មិន​តើន​ភ្ញាក់ដដែល​។ ស្រី​មេមត់ Maleficent សោយ​សោក​យ៉ាង​ខ្លាំង​ តែ​ក៏​ពុំ​បាន​សុំ​ឲ្យ​អារ៉ូរ៉ា​​អភ័យ​ទោស​ឲ្យ​ដែរ។ កំហុស​គ្រប់​យ៉ាង​កើត​ឡើង​ដោយ​សារ​តែ​ចិត្ត​លោភលន់​របស់​មនុស្ស​ ដោយ​ស្នេហា​បោក​ប្រាស់ ក្បត់​ចិត្ត និង​គំនុំ​សង​សឹក​។ ចុង​ក្រោយ​ Maleficen ក៏​ជម្ពិត​ថើបព្រះ​នាង​ អារ៉ូរ៉ា(Aurora) ដោយ​ក្តី​ស្រឡាញ់​​យ៉ាង​ជ្រាលជ្រៅ​ លាយ​ឡំ​ដោយ​វិប្បដិសារី​ក្នុង​នាម​ជា​ម្តាយ​ចិញ្ចឹម(តាម​មើល​ថែ​ពី​ចម្ងាយ) ​តាំង​​ពី​ថ្ងៃ​នាង​កើតរហូត​ដល់​អាយុ​១៦​ឆ្នាំ​។ បន្តិច​ក្រោយ​មក ព្រះនាង​អារ៉ូរ៉ា(Aurora)ក៏ភ្ញាក់ដឹង​ខ្លួន ហើយ​នេះ​បញ្ជាក់ឲ្យ​ឃើញ​​ថា ស្នាម​ថើប​ដែល​កើត​ចេញ​ពី​សេចក្តីស្រឡាញ់​​ពិត(ស្នេហ៍​ពិត) គឺ​ជា​សេចក្តី​ស្រឡាញ់​​របស់​ម្តាយ​ចំពោះ​កូន​ ទោះ​បី​ជា​មិន​​មែន​ជាម្តាយ ​និងកូន​បង្កើត​ក្តី​។

ចំពោះ​មន្ទិល​ចុង​ក្រោយ​ តើ​ហេតុ​ផល​អ្វីបាន​ជា​ភាព​យន្តរឿង​​ Maleficent ប្តូរ​សាច់​រឿង​របស់​ទេវកថាល្បី​ឈ្មោះ​ Sleeping Beauty ដោយ​ប្តូរ​ឲ្យ​ការ​ថើប​របស់​ព្រះ​រាជបុត្រ ក្លាយ​ជារបស់ស្រីមេមត់ Maleficent វិញ? ហាសហា… នេះ​ជា​ភាព​យន្ត​ Twist Ending មួយ​ដែល​អ្នក​មិន​ចាប់​អារម្មណ៍​គឺ​មិន​ដឹង… ព្រោះ​ចុង​ក្រោយ​ អ្នក​និទាន​រឿង​(ដែល​ធ្លាប់​និយាយ​ពេល​បើក​ឆាករឿង​ដំបូង​ថា កាល​ពី​ព្រេង​នាយ…ប្លា… ប្លា…) បាន​​បញ្ជាក់​យ៉ាង​ច្បាស់ថា៖ [រឿង​ Maleficent ប្រហែល​ជា​មិ​នដូច​រឿង​និទាន ​ដែល​លោក​​អ្នក​ធ្លាប់​បាន​ស្តាប់​តាម​ការ​និយាយ​តៗ​គ្នា​ពីមុន​មក​នោះ​ទេ ព្រោះ​រឿង​ថ្មី​នេះ ​ខ្ញុំ​ដែល​ជា​តួ​អង្គ​ព្រះ​នាង​ Sleeping Beauty ពី​​មុន ​​ជា​អ្នក​ប្រឌិត​ឡើង​ដោយ​ខ្លួន​ឯង! ] 😀

P.S: រឿង​នេះ​ខ្ញុំ​ជូន​ពិន្ទុ ៩/១០ ៕

Read Full Post »


ផ្កាយNoVeLs*– មួយរយៈនេះ ខានបានយកខ្សែភាពយន្តរន្ធត់ៗល្បីៗមកផ្សាយ ព្រោះរវល់នោះរវល់ មិនថាការងារ ការសិក្សា ការសរសេរ គឺរវល់សឹងតែដកដង្ហើមមិនរួច(ពិសេសរវល់ត្រៀមខ្លួនដេយ៍ប្យូឆាប់ៗនេះ! 😛 ) តែថ្ងៃនេះដោយទើបតែប្រឡងចប់ថ្មីៗ ក៏យកភាពយន្តរន្ធត់មួយមកចែករម្លែក។

Husk ជាខ្សែភាពយន្តភ័យរន្ធត់មួយ ដែលនិយាយអំពីអាថ័ន របស់ពាក្យបណ្តាសា ដែលសណ្ឋិតនៅក្នុងទីងមោងចាំចាប។ ធម្មតាទីងមោងចាំចាប គឺប្រើសម្រាប់ដេញចាប ឬបង្អើលសត្វដែលចង់ចូលស៊ីភោគផលដំណាំ តែទីងមោងនេះ សូមប្រាប់ឲ្យហើយចុះ វាមិនបានរង់ចាំចាប ឬដេញសត្វដូចដែលលោកអ្នកគិតនោះទេ តែវាចាំដើម្បីយកជីវិតមនុស្សណា ដែលចូលទៅក្នុងចម្ការពោត ហើយសម្លាប់យកធ្វើជាបក្សពួកទីងមោងបន្ថែមទៀត។

Husk ផ្តើមនិយាយពីមិត្តភក្តិមួយក្រុម ដែលជួបឧប្បត្តិហេតុរថយន្តតាមផ្លូវ ដោយសារបើកបុកសត្វក្អែកបួនប្រាំក្បាលដែលហើរកាត់មុខ។ ដោយសាររថយន្តខូចទៅណាមិនកើត និងបាត់មិត្តភក្តិម្នាក់ដោយគ្មានសារហេតុ ពួកគេក៏សម្រេចចិត្តចូលទៅសុំជំនួយពីផ្ទះមួយខ្នង តែត្រូវដើរឆ្លងកាត់ចម្ការពោតដ៏ធំហើយខ្ពស់ដាច់កន្ទុយភ្នែកមួយ ដោយពួកគេមិនដឹងសោះថា នៅក្នុងនោះមាន ទីងមោងចាំចាប ដែលត្រូវបណ្តាសា រង់ចាំយកជីវិតពួកគេគ្រប់ពេលវេលា។

បើគ្រាន់តែឃើញគម្របប៉ុស្ត័រ ដែលមានតែរូបទីងមោងមួយនោះ ហាក់ដូចជាមិនល្អមើលទេ តែកុំប្រញាប់សរុបតែសម្បកក្រៅ(ដូចខ្ញុំ! ហិហិ… តាមពិតឃើញចេញលក់យូរហើយ តែទើបតែទិញមើល ព្រោះគ្មានរឿងថ្មីមើល) ព្រោះទីងមោងដេញចាបនេះ មិនមែនសម្លាប់មនុស្សស៊ើកមមើក ដូចខ្មោច Zombie នោះទេ តែវាលឿននិងរហ័សហួសពីការគិត ថែមទាំងពូកែលាក់ខ្លួនបានទៀតផង មិនដឹងថា នឹងលេចខ្លួនចេញមកពេលណា ដែលនេះ ជាចំណុចល្អរបស់ភាពយន្តរឿងនេះ ព្រោះធ្វើឲ្យរន្ធត់ស្រៀវគ្រប់ពេលវេលា ស្ទើរតែដកដង្ហើមមិនទាន់។

ខ្ញុំមើលរឿងនេះ សូម្បីតែកំពុងញ៉ាំអី ក៏ភ្លេចទំពាដែរ ព្រោះមិនដឹងថា ខ្មោចទីងមោងនោះចេញមកឆ្មក់ចាប់តួពេលណា ដ្បិតឃើញតែព្រៃពោតក្រាស់ឃ្មឹក និង ខ្ពស់មើលមិនឃើញវាល ដើរមិនស្រួលអាចវង្វេងក្នុងព្រៃពោតនោះក៏ថាបាន។ ពិសេសចុងបញ្ចប់រឿងក៏ធ្វើបានល្អ មុននឹងចប់ ធ្វើឲ្យខ្ញុំដកដង្ហើមផិតផើយៗតាមតួអង្គ ព្រោះមិនដឹងថា ខ្មោចទីងមោងនោះ នឹងចេញមកពេលណា តាមមកទាន់ឬទេ ខណៈដែលតួអង្គក៏រត់ទៅណាមិនរួច ស្រែកក៏មិនឮ បានត្រឹមតែហាមាត់ឲ្យគេជួយតែគ្មានសំឡេង! ពេលមើលឈុតនេះ ពិតជាពិបាកទ្រាំខ្លាំងណាស់ ព្រោះសឹងតែភ្លេចដកដង្ហើមតាមរឿងពិតមែន។ ចុះដឹងទេថាពេលតួខ្មោចទីងមោងនោះចេញមកវាធ្វើដូចម្តេច? ហាសហាសហា… មិនទាន់ប្រាប់ទេ ទុកឲ្យមើលខ្លួនឯងចុះ នោះនឹងដឹងថា ពេលរឿងនេះលេងចប់ បេះដូងក៏មិនទាន់ឈប់លោត!

ពិតជាសរសើរបរទេសមែន ដែលគេចេះយក [ទីងមោង] មកផលិតបានជាខ្សែភាពយន្តព្រឺរន្ធត់ដ៏ល្អមួយបែបនេះ។ ទីងមោង នៅក្នុងជំនឿ និង ផ្នត់គំនិតខ្មែរ ក៏មានរឿងរ៉ាវរាប់មិនអស់ ដែលអាចយកមកសរសេរ ឬផលិតជាខ្សែភាពយន្តបានរាប់រយរឿង ចុះហេតុអ្វីអ្នកនិពន្ធ អ្នកដឹកនាំរឿងខ្មែរ ចូលចិត្តផលិតតែរឿងច្រំដែលៗ មើលមិនចូលភ្នែកបែបនេះ!!? (Sic)

Read Full Post »


ផ្កាយ​NoVeLs*– អ្នក​ដែល​ធ្លាប់​ជាប់​ចិត្ត​ដិត​អារម្មណ៍​នឹង​រឿង​ Valentine’s Day ភាព​យន្ត​ស្នេហា​រ៉ូមែន​ទិក​​ កាល​ពី​ដើម​ឆ្នាំ​កន្លង​មក​ ច្បាស់ជា​មិន​ខក​បំណង​ទេ​នឹង​ភាព​យន្ត​​​រឿង​ New Year’s Eve ដែល​ជា​ស្នាដៃ​​ពាក់​បូ​ក្រហម​ឆ្លង​ឆ្នាំ​ថ្មី​របស់​អ្នក​ដឹក​នាំ​រឿង​ ហ្គា​រី​ ម៉ាឈែល (Garry Marshall)​ ដែល​នឹង​និយាយ​ពី​​រឿងរ៉ាវ​ស្នេហា​របស់​មនុស្ស​ច្រើន​នាក់​​ ច្រើនប្រភេទ ​ដែល​កើត​នៅ​ក្នុង​ទី​ក្រុង​ញូវ​យ៉ក​​ ក្នុង​រាត្រី​​មុន​​ថ្ងៃ​ចូល​ឆ្នាំ​។ ទាំង​សំឡេង​សើច​ក្អាក​ក្អាយ​ ទាំង​​ក្រាម​ទឹក​ភ្នែក និង​ស្នាម​ញញឹម​ នឹង​នាំ​មក​ជូន​ប្រិយ​មិត្ត​​ដោយ​ ​តារា​សម្តែង​ពេញ​ដោយ​សមត្ថភាព​ប្រមាណ​​​ជាង​១០​រូប។

  • ឈុតខ្លះក្នុងរឿង​, ភាព​យន្ត​ Trailer

ភាព​យន្ត​រឿង​ New Year’s Eve នឹង​អប​អរ​សាទរ​សេចក្តី​ស្នេហា​ សេចក្តី​សង្ឃឹម​ ការ​ផ្តល់​អភ័យ​ ឱកាស​កែ​ខ្លួន និង​​ការ​ចាប់​ផ្តើ​ម​ថ្មី​ដ៏​ស្រស់​ថ្លា​ នៅ​ក្នុង​រឿង​រ៉ាវ​ដែល​មាន​បញ្ចូល​ទាំង​អ្នក​មាន​គូ​ស្នេហ៍ និង​អ្នក​នៅ​លីវ ដែល​ត្រូវ​បង្ហាញ​​ប្រាប់​តាម​រយៈ​​ពាក្យ​សន្យា​នៃ​ទីក្រុង​ញូវ​យ៉ក​​ក្នុង​រាត្រី​ដែល​មាន​ភ្លើង​ពណ៌​​ភ្លឺ​ចិញ្ចែង​ចិញ្ចាច​​បំផុត​ប្រចាំ​ឆ្នាំ​។

អ្នក​ដឹក​នាំ​រឿង​ ហ្គា​រី​ ម៉ាឈែល​ និង​បណ្តា​អ្នក​សម្តែង​​ទាំង​អស់​នេះ នឹង​​ធ្វើ​ដំណើរ​​ជុំ​វិញរដូវ​កាល​​ឈប់​សម្រាក​ប្រចាំ​ឆ្នាំ​២០១១​​​​ តាម​រយៈ​ភាព​យន្ត​​កំប្លែង​ស្នេហា​​រ៉ូមែន​ទិក​ New Year’s Eve។

  • សង្ខេបរឿង

ហ៊ែររី(​រ៉ូបឺត​​ដឺ​នី​រ៉ូ Robert De Niro) បុរស​មាឌ​មាំ​ដែល​បៀត​បៀន​ដោយ​រោគ​កាច​សាហាវ​​ ​បាន​សម្លឹង​មើល​រយៈ​ពេល​ចុង​ក្រោយ​នៃ​ជីវិត​​របស់​ខ្លួន​​​ក្នុង​រាត្រី​ឆ្លង​ឆ្នាំ​ថ្មី​​​នៅ​មន្ទីរ​ពេទ្យ​។ ចំណែកនាង​​​លេខា​ក្រមុំ​ អ៊ិង​គ្រិត​(មីឆេល​ ហ្វៃ​ហ្វ័រ Michelle Pfeiffer) កំពុង​សម្រេចចិត្ត​​បញ្ឈប់​សម្ព័ន្ធ​ភាព​ដែល​គ្មាន​សង្ឃឹម​របស់​ខ្លួន​ឯង​។ រី​ឯ ​គ្លែរ​(ហ៊ី​ឡារី​ ស្វែង​ Hilary Swank)) កំពុង​មមាញឹក​នឹង​ការ​សម្តែង​​​​​នៅ​ក្នុង​រាត្រី​ឆ្លង​ឆ្នាំ​ដ៏​ធំ​មួយ​នៅ​​លើ​ដង​ផ្លូវ​​ ថាម៍​ឃ្វែរ​ ខណៈ​ដែល​រ៉ែន​ឌី​(អេស្ស​​តាន់​ ឃុត​ឆ័រ Ashton Kutcher)​ជា​បុរស​ម្នាក់​ដែល​ស្អប់​រាត្រី​ឆ្លង​ឆ្នាំ​ថ្មី​​ជាទីបំផុត​​៕

  • រូបភាព​​ខ្លះក្នុងរឿង

Read Full Post »


Saw VIII ដែលត្រៀមដាក់បញ្ចាំងក្នុងឆ្នាំ២០១២នេះ

ផ្កាយ​NoVeLs*– អឺមមម… សូម​សម្រួល​​ចិត្ត​ឲ្យ​បាត់​ស្រៀវ​​សិន​មុន​នឹង​និយាយ​ ហិហិ 😀 គឺ​ខ្ញុំ​ទើប​តែ​មើល​​រឿង​​ SAW ពី​វគ្គ​I ដល់​​វគ្គ​VII​ ចប់ កាល​ពី​ប៉ុន្មាន​ថ្ងៃ​មុន​នេះ​។ និយាយ​រួម​​ វា​ជា​ការ​​មើល​​ជម្រះ​បញ្ជី​​ចាស់​ដែល​នៅ​សេស​សល់​កាល​ពី​លើក​មុន​ បន្ទាប់​ពី​​បាន​ទស្សនា​រឿង​ Insidious រួច​មក​។ ក្រោយ​ពី​បញ្ចប់ Insidious ខ្ញុំ​​​ពិត​ជា​អត់​​ស្ងើច​សរសើរ​មិន​បាន​​មិន​ថា​អ្នក​​ដឹក​នាំ​រឿង​ ឬអ្នក​​សរសេរ​​អត្ថបទ​ភាព​យន្ត​ ​​ព្រោះ​គ្រប់​ៗ​​ឆាក​សុទ្ធ​តែ​ពញ្ញាក់​អារម្មណ៍​​អ្នក​មើលឲ្យ​ហើប​គូទ​ពី​កៅ​អី​​។​ តាម​រយៈ​ Insidious ខ្ញុំ​ក៏​ដឹង​ថា អ្នក​ដឹក​នាំ​រឿង​នេះ ធ្លាប់​សាង​កេរ្តិ៍​ឈ្មោះ​ល្បី​ខ្ទរ​ពិភព​លោក​ម្តង​រួច​មក​ហើយ ​​នៅ​ក្នុង​ភាព​យន្ត​ត​ភាគ ដែល​មាន​ឈ្មោះ​មួយ​ម៉ាត់​យ៉ាង​ខ្លី​ថា Saw(SAW/ JIGSAW/  CHAIN SAW/ SEE SAW-GAME/ SEE SAW SEEN/)។​

ហេតុ​ដូច្នេះ តើ​អ្នក​ដែល​ងប់​ងល់​នឹង​ភាព​យន្ត​​បែប​រន្ធត់ៗដូច​ខ្ញុំ​នេះ​ឬ បណ្តោយ​ឲ្យ​រឿង​ល្អៗ​បែប​នេះ​រំលង​ផុត??? ហិហិ… គឺ​ពិត​ជា​មិន​ឲ្យ​ផុត​ពី​២៤​ម៉ោង​ទេ តាម​រក​ទិញ​ទាល់​តែ​បាន​គ្រប់​៧​វគ្គ​ មួយ​រំពេច​។ ឥឡូវ​កុំ​ឲ្យ​ខាត​ពេល​ ចូល​សាច់​រឿង​តែ​ម្តង​​…

ខ្សែ​ភាព​យន្ត​​ Saw​ មក​ដល់​ឆ្នាំ​២០១១​នេះ​ ផលិត​បាន​៧​វគ្គ​ហើយ ហើយ​​មិន​យូរ​មិន​ឆាប់​នេះ Saw VIII នឹង​ចេញ​មក​ទៀត​នៅ​ឆ្នាំ​២០១២​ខាង​មុខ​។ Saw​ វគ្គ​I ចាប់​កំណើត​នៅ​ក្នុង​ឆ្នាំ​ ២០០៤​ ដឹក​នាំ​រឿង​ដោយ​ James Wan អត្ថបទ​ភាព​យន្ត​ដោយ Leigh Whannell, James Wan ។ តាម​រយៈ​សាច់​រឿង​ដែល​បាន​មើល​មក​ហើយ​ទាំង​៧​វគ្គ​ ចំណង​ជើង​ Saw​ មួយ​ម៉ាត់ អាច​មាន​ន័យ​ប្រទាក់​គ្នា​លើ​៤,៥​ករណី​។ ករណី​ទី​១ អាច​មាន​ន័យ​សំដៅ​លើ ​រណា ឬ ការ​កាត់​ចៀរ​ស្បែក​ស្រស់​ៗ(SAW) ​​ដែល​បង្ហាញ​យ៉ាង​ច្បាស់​នៅ​ក្នុង​វគ្គ​I។ ​ករណី​ទី​២ សំដៅ​​លើ​ឈ្មោះ​ឃាតករ​ក្នុង​រឿង ​ដែល​ហៅ​ខ្លួន​ឯង​ថា JIGSAW ព្រោះ​គ្រប់​ពេល​ដែល​នុយ​របស់​ខ្លួន​ស្លាប់ ឃាតករ​តែ​ង​តែ​ចៀរ​ស្បែក​សាក​សព​ជា​សញ្ញា​Jigsaw។ ឯ Saw ​ក្នុង​ករណី​ទី​៣ អាច​សំដៅ​លើ​​អង្គប់​ច្រវាក់​ ឬ​ខ្នោះ (CHAIN SAW) ​ ដែល​ឃាតករ​តែ​ង​តែ​យក​​មក​ដាក់​នុយ​របស់​ខ្លួន​។ ចំពោះ​ករណី​ទី​៤​ អាច​សំដៅ​លើ​​ ការ​មើល​ការ​លេង​ហ្គេម​ ជាប់​ខ្នោះ​ច្រវាក់ ដាក់​អង្គប់​ ឬ​អារ​កាត់​ជើង​ដោយ​ប្រើ​​រណា(SEE SAW-GAME)។ ​ចំណែក​ន័យ​ក្នុង​​ករណី​ចុង​ក្រោយ ​អាច​មក​ពី​ពាក្យ​ SEE SAW SEEN នេះ​ឯង​។ ​ សរុប​​មក​ រឿង Saw ទាំង​៧​វគ្គ​នេះ​ សុទ្ធ​តែ​ក្តោប​ន័យ​ទាំង​ប្រាំ​នេះ​ទាំង​អស់​ ហើយជឿ​ជាក់​ថា​​ Saw ក្នុង​វគ្គ​បន្ត​បន្ទាប់​ទៀត ​ក៏​មិន​ប្រាស​ចាក​ពី​ន័យ​ទាំង​នេះ​ដែរ​។

ខ្សែ​ភាព​យន្ត​អង្រួន​ព្រលឹង​ Saw មាន​​ដំណើរ​រឿងលោត​កញ្ឆក់​ ​ កន្ត្រាក់​អារម្មណ៍​​ ពី​ឆាក​មួយ​ទៅ​ឆាក​មួយ​ពេញ​ប្រៀប​​ទៅ​ដោយ​ល្បិច​លាក់​សាច់​រឿង​ យ៉ាង​ប៉ិន​ប្រសប់​​ផុត​វិស័យ ​​ធ្វើ​ឲ្យ​គ្រប់​ឆាក​កាន់​តែ​​រន្ធត់​​ស្រៀវ​​​ស្ញើប​ស្ទើរ​តែ​ភ្លេច​ដក​ដង្ហើម​។ ហេតុ​ផល​នេះ​បាន​ធ្វើ​ឲ្យ Saw  ទទួល​បាន​​ការពេញ​និយម​យ៉ាង​ខ្លាំង ពី​សំណាក់​​ប្រិយមិត្ត​ អ្នក​ស្នេហា​ភាព​យន្ត​រន្ធត់​ព្រឺ​ព្រួច​​​​ មិន​ចេះ​ឈប់​ឈរ​​។​ Saw ជា​រឿង​រ៉ាវ​របស់​កំពូល​ឃាតករ​​ ដែលមាន​គេ​តំណាល​តៗ​គ្នា​​តាម​រយៈរហស្សនាម​ Jigsaw រួម​នឹង​​សម្តី​អមតៈរបស់​ខ្លួន​គឺ «​យើង​ចង់​លេង​ហ្គេម…​»។ ផ្ទៃ​រឿង​ទាំង​មូល​ ​ពោរ​ពេញ​ទៅ​ដោយ​ ឆាកឃាតកម្ម​សាហាវ​ៗ មាន​ឈាម​ខ្ទាត​ពេញ​​អេ​ក្រង់​​ ធ្លាយ​ពោះ​វៀន​ផ្ទុះ​ខួរ​ស្រស់​ៗ ដោយ​ប្រើ​​គ្រឿង​ចក្រ​ អង្គប់​ អន្ទាក់ ​ និង​រណា​កាត់​អារជើង​ខ្លួន​ឯង​ អម​ទៅ​ដោយ​​សំឡេង​ស្រែក​​ថ្ងួច​ថ្ងូរ​​យ៉ាង​ឈឺ​ចាប់​និង​វេទនា​​​។

តុក្កតា តំណាង ឲ្យ តួ អង្គ Jigsaw, គ្រាន់ តែ ឃើញ ក៏ ព្រឺ

ដំណើរ​រឿងទាំង​៧​វគ្គ​ ​មិន​បាន​រៀប​តាម​លំដាប់​ដូច​រាប់​លេខ​ទេ គឺ​ អ្នក​និពន្ធ ​និង​អ្នក​ដឹក​នាំ​បាន​រៀប​ឆ្លាស់​គ្នា​​ពី​មុខ​ទៅ​ក្រោយ ​ពី​ក្រោយ​ទៅ​កណ្តាល​(​១,៣,៥,២,៤…) បោក​អ្នក​មើល​ឲ្យ​​ខំ​តាម​ដាន​សាច់​រឿង​រហូត​ រួច​បង្កើត​ពន្លក​បញ្ហា​ថ្មី​ ធ្វើ​ឲ្យ​អ្នក​មើល​ដឹង​ថា​ ពិត​ជា​នៅ​មាន​ភាគ​បន្ត​ ហើយ​រឿង​រ៉ាវ​ខាងមុខ​នឹងទៅ​ជា​យ៉ាង​ណាទៀត? ក្នុង​ចំណោម​វគ្គ​ទាំង​អស់​ ​ដែលបាន​​ដាក់​បញ្ចាំង​រួច​ហើយ​នេះ វគ្គ​ដែល​លេច​ឮ​ល្បី​​រន្ទឺ​រ​តៗ​គ្នា​ថា​ល្អ​បំផុត​របស់​ស៊េរី​រឿង​នេះ​ គឺ​វគ្គ​I ព្រោះ​ជា​វគ្គ​ដែល​មាន​ឆាក​អារ​ជើង​ស្រស់​ៗ ​ធ្វើ​ឲ្យ​ស្រៀវ​រន្ធត់​រហូត​អត់​ដង្ហើម​ ពិសេស​នោះ​គឺ​​​ចុង​បញ្ចប់​រឿង​​បាន​ធ្វើ​ឲ្យ​អ្នក​មើល​បះ​សក់ ដាច់​ផ្ងារ​តូង​​គ្រប់​ៗ​គ្នា ​ព្រោះ​មិន​នឹក​ស្មាន​ថា​ អ្នក​និពន្ធ​និង​អ្នក​ដឹក​នាំ​រឿង​ អាច​លាក់​សាច់​រឿង​បាន​ល្អិត​ល្អន់​ដល់​កំពូល​យ៉ាង​ដូច្នេះ​​។

«ជីវិត​របស់​មនុស្ស​យើង​មួយ​ជីវិត​មាន​តម្លៃ​ប៉ុណ្ណា​ ហើយ​ក្នុង​បច្ចុ​ប្បន្ន​មនុស្ស​យើង​ឃើញ​តម្លៃ​​របស់​ខ្លួន​ឯង​តិច​ច្រើន​កម្រិត​ណា?» នេះ​ជា​មូល​ន័យ​របស់​រឿង​។ អ្នក​ខ្លះ​ក្រោយ​ពី​មើល​រឿង​នេះ​ហើយ​ អាច​គិត​ថា តួ​អង្គ​Jigsaw គឺ​ជា​ឃាតករ​រោគ​ចិត្ត​ តែ​ការ​ពិត​​ មិន​មែន​ទេ។ Jigsaw គឺ​ជា​ឃាតករ​​ដែល​ពោរ​ពេញ​ទៅ​ដោយ​ទស្សនវិជ្ជា​ជីវិត​ និង​មាន​ការ​យល់​ដឹង​ពី​ចិត្ត​វិទ្យា​ខ្ពស់។ ហេតុ​ដូច្នេះ​ហើយ​ទើប​ក្រោយ​ពី​ Jigsaw បាត់​បង់​ជីវិត​នៅ​ក្នុង​វគ្គ​៤, Jigsaw នៅ​តែ​ប្រើ​អាច​​ឃាតករ​ថ្មី​ឲ្យ​មក​​បន្ត​វេន​ កម្ចាត់​មនុស្ស​ដែល​មិន​ស្គាល់​ពី​តម្លៃ​ជីវិត​តាម​ក្រិត​ក្រម​របស់​ខ្លួន​មិន​ចេះ​ចប់។ បើ​ដូច្នេះ​ តើ Saw នឹង​មាន​ដល់​វគ្គ​ប៉ុន្មាន?​​?? ចម្ងល់​នេះ​មាន​តែ​រង់​ចាំ​តាម​ដាន​ទាំងអស់​គ្នា​ប៉ុណ្ណោះ!! 😀

Read Full Post »

Older Posts »